2026 чылдан эгелеп Тывага Ажаалда-тежээлде болгаш харагалзал органнарының ажылдакчыларынга профессионал байырлалды тургузар. Республиканың чазаа ол хүннү тургузарының дугайында хоойлу төлевилелин бо неделяда бадылааш, парламентиже киирген. Документ езугаар ол хүннү май 18-те байырлаар.
ТР-ниң Өөредилге яамызы ажаалда-тежээлде болгаш харагалзал органнарының ажылдакчыларынга байырлал хүнүн тургузарының дугайында шиитпири, Тываның эрге-чагыргзыаның өг-бүле тургузуунга, ооң ат-алдарын бедидеринге болгаш ие-чаштың камгалалынга онза ужур-утканы бээр сорулга-биле хүлээп алдынганын тайылбырлаан. Чаштар төрүттүнериниң болгаш хөй ажы-төлдүг өг-бүлелер үлүүнүң талазы-биле чуртта мурнуку черни ээлеп турар бистиң республикага бо айтырыг дыка чугула.
Бөгүнде 390 ажыг кижи ажылдап турар ажаалда-тежээлде болгаш харагалзал органнарының ажыл-чорудулгазы улуг рольду ойнап турар. Олар ада-иезиниң хайгааралы чок арткан уругларны ажаап-тежээри, амыдыралдың бергелеринге таварышкан өг-бүлелерни деткиири дээш, сагыш човап турарлар. Дыка хөй өг-бүлелер ындыг хайгааралдың ачызында камгалаттынып, анаа амыдыралче катап эглип, уругларның сонуургалын камгалап, социал өскүс чоруктуң санын эвээжедип турар.
Аңгы профессионал байырлал – ажаалда-тежээлде болгаш харагалзал адырында ажылдап чоруур кижи бүрүзүнүң уругларның болгаш өг-бүлелерниң амыдырал-чуртталгазын өскертир шиитпирлерни хүлээп албышаан, улуг харыысалганы бодунга хүлээнип алган берге болгаш буянныг ажылынга улуг үнелел-дир.
Бо хүннү шилип алганы өг-бүлеге болгаш өг-бүле тударынга тураскааткан бирги хоойлужудулга актызы-биле холбаалыг. Тыва Арат Республика үезинде, 1930 чылдың май 18-те Өг-бүле, бадылга болгаш ажаалда-тежээлде дугайында бөлүк хоойлулар хүлээп алдынган. Хоойлулар өг-бүлениң бадылгазын болгаш чарлырын бүрүткеп, өг-бүледе өнчү-хөреңги хамаарылгаларын өйлеп-таарыштырып, ада-иелерниң ажы-төлүн азырап, кижизидип база өөредир хүлээлгелерин айыткан.
Россияда ажаалда-тежээлде болгаш харагалзал ажылдакчыларының аңгы байырлал хүнү чогун сагындыраал. Чылдың-на июнь 8-те демдеглеп турары Чурттакчы чоннуң социал камгалал адырында ажылдакчының хүнү деп ниити байырлал бар. Ынчангаш чамдык регионнар 2024 чылда – РФ-тиң Өг-бүле чылында, ажаалда-тежээлде ажылдакчыларынга тураскаадып тускай хүннү эрттирер деп шиитпирлээн. Краснодар край биле Забайкалье марттың 12-де Ажаалда-тежээлде болгаш харагалзал ажылдакчызының хүнүн демдеглеп турар.