Улусчу чогаадылга бажыңынга Башкы хүнүнге тураскааткан байырлыг хемчег болган. Уруглар садының кижизидикчи башкыларындан эгелээш, ортумак профессионал өөредилге черлериниң башкыларынга чедир, өөредилгениң бүгү деңнелдериниң төлээлери чыглып, Тывада Башкыларга тураскааткан улуг неделязының түңнелин үндүрген.
Тываның Баштыңы Владислав Ховалыг республиканың башкыларынга профессионал байырлалы-биле байырны чедирген. Өөредилге адырының регионнуң болгаш чурттуң келир үезин тодарадырга онзагай ужур-утказын ол демдеглээн.
Регионнуң удуртукчузу республика бюджединиң 40 хире хуузу өөредилге адырын хөгжүдеринче угланганын дыңнаткан. «Бистиң ажы-төлүвүс эки өөренип, башкыларывыс чедиишкинниг ажылдазын дээш, өөрениринге болгаш ажылдаарынга таарымчалыг байдалдарны тургузуп турар бис» - деп, ол чугаалаан.
Регион чылдың-на национал төлевилелдерге киржип, федералдыг төптен деткимчени ап турары-биле, Тывада өөредилге инфраструктуразының хөгжүлдези чедип алдынган. Чүгле ийи чыл – кыска хуусаа дургузунда 11 чаа, амгы үениң школаларын деңге тутканы, Тываның төөгүзүнде бир дугаар болуушкун болуп турар.
Владислав Ховалыг өөредилге албан черлеринче эртемнер башкыларын хаара тудар дээн ажылды база чугаалаан. Чижээ, «Көдээ черниң башкызы» федералдыг программа-биле республиканың школаларынче 70 хире башкыны хаара туткан. Школада чаа ажылдап эгелээн аныяк башкыларны деткиири-биле «Мээң башкым» төлевилелди боттандырып, чаңгыс удаа бээр акша төлевирин доктааткан.
Башкыларның профессионал өзүлдезинче болгаш мергежилин бедидеринче онза кичээнгей угланган. «Чылдың башкызы» бүгү-российжи мөөрейге тиилээн физика-математика башкызы Айдаш Хертек чаа өөредилге чылында, Каа-Хем суурда чаа школаны удуртуп эгелээнин Тываның Баштыңы демдеглээн. Владислав Ховалыг салым-чаяанныг башкы чаа албан-дужаалынга бодун оон-даа чедиишкинниг көргүзеринге бүзүрелин илереткен.
Республика Баштыңы эрткен өөредилге чылында башкыларның чедиишкиннерин база демдеглээн. Школаларда математика кичээлдериниң шынары экижээнинден алдын медальдыг доозукчулар саны көвүдээн. Элээн каш эртемнерде чаңгыс аай күрүне шылгалдазының түңнелдери экижип, аңгы-аңгы деңнелдиң олимпиадаларында киржикчилер саны көвүдээн.
Ада-чурт камгалакчызының чылында болгаш Ада-чурттуң Улуг дайынынга Тиилелгениң 80 чыл оюнда аныяктарга патриотчу чорук болгаш харыысалганың, Төрээн чуртунга ынакшылды кижизидеринге башкыларның үлүг-хуузун Владислав Ховалыг айыткан. Школачыларның болгаш башкыларның шериг албанныгларны деткиир дээн: дайынчыларга идик-хеп даараары, фронтуже чагаалар чорудары, гуманитарлыг ачы-дуза чыырынче угланган кады ажылдажылгазын ол демдеглээн.
«Бо байырлал чоннуу апарган деп болур, чүге дизе кижи бүрүзү баштайгы башкызын, класс удуртукчу башкызын, азы ынак эртеминиң башкызын сактып чоруур. Кижи бүрүзүнүң амыдыралында башкызы улуг рольду ойнап чоруур, ынчангаш оларның ажылы кезээ шагда онза хүндүткелдиг» - деп, Владислав Ховалыг онзалап демдеглээн. Башкыларга чаа-чаа чедиишкиннерни, салым-чаяанныг өөреникчилерни, быжыг кадыкшылды, амыр-тайбыңны, чечектелиишкинни күзээн.
Байырлыг хурал үезинде, Россияның Президентизиниң болгаш Тываның Баштыңының өөредилге адырында тускай шаңналдарын алган тергиин башкыларның адынга сертификаттарны байырлыы-биле тывыскан.
Башкылаашкын ажылында чедиишкиннери дээш, Россия Федерациязының Президентизиниң 200 муң рубль шаңналын Чаа-Хөл ортумак школазының төрээн дыл болгаш чогаал башкызы Аянмаа Даваага, Тыва Республиканың күрүне лицейиниң биология башкызы Аэлита Самданга, Кызыл-Мажалыктың 1 дугаар школазының математика башкызы Виктория Ондарга, Сүт-Хөл кожууннуң Ак-Даш школазының физика болгаш математика башкызы Римма Ооржакка, Кызылдың 3 дугаар школазының математика башкызы Виктория Тембрелге, Шагаан-Арыг хоорайның 1 дугаар школазының математика болгаш информатика башкызы Чечек Кууларга тывыскан.
Чаа инновациялыг өөредилге программаларын, амгы үениң технологияларын болгаш төлевилелдернин идепкейлиг ажыглап турары дээш, Тываның Баштыңының 100 муң рубль шаңналын Сукпак школазының күш-культура башкызы Галина Оолакка, Чаа-Хөл школазының төөгү болгаш ниитилел билиглериниң башкызы Марина Даваага, Тээли школазының орус дыл болгаш литература башкызы Жанна Севекке база республиканың эмчи колледжизиниң клиниктиг эртемнер башкызы Раиса Шалчимага тывыскан.
Инновациялыг чурумда ажылдап чоруур класс удуртукчуларының аразында Тываның Баштыңының 80 муң рубль хемчээлдиг шаңналынга Каа-Хемниң 2 дугаар школазының орус дыл болгаш литература башкызы Алдынай Монгуш, Кызылдың 5 дугаар гимназиязының немелде өөредилге башкызы Долана Монгуш, «Тываның кадет корпузу» республиканың школа-интернадының биология болгаш химия башкызы Азияна Ооржак, Р. Кенденбиль аттыг республиканың уран чүүл школазының география башкызы Алефтина Хомушку база Ак-Довурактың «Өлчей» лицейиниң орус дыл болгаш литература башкызы Чойганмаа Лопсан төлептиг болган.
Тываның Баштыңы федералдыг болгаш республика чергелиг күрүне шаңналдарын өөредилгениң шылгараңгай ажылдакчыларынга өчаңчыл езугаар тывыскан.
Ак-Довурак хоорайның 1 дугаар школазының Төрээн чурттуң айыыл чок чоруунуң болгаш камгалалдың үндезиннери эртемниң башкызы Аяс Ооржак, Каа-Хем кожууннуң Бүрен-Аксы школазының математика башкызы Урана Хертекке Россия Федерациязының Чырыдыышкын яамызының Хүндүлел бижиктерин алган.