Республиканың өөредилге албан черлеринде 152 школа театрлары чедиишкинниг ажылдап турар. «Өөредилге» национал төлевилелдиң «Уруг бүрүзүнүң чедиишкини» федералдыг төлевилел езугаар база 2022 чылдан 2024 чылга чедир театрлар амгы үениң дериг-херекселдери-биле чепсегленген, база президентиниң чаа эгелээшкиннери болгаш «Аныяктар болгаш уруглар» национал төлевилели-биле ол ам-даа уламчылаар.
Школаларның шупту театрлары Россияның Чырыдыышкын яамызының «Прогресс» уругларның бүгү талалыг сайзырал төвүнүң Бүгү-российжи реестринче кирген. театр бөлгүмнеринде аңгы-аңгы назылыг 6,5 муң ажыг уруглар боттарының чогаадыкчы салым-чаяанын көргүзүп турар.
«Амгы үениң театр сценаларынга таарыштыр кылган тускай реквизиттер болгаш идик-хептер херек. Бо бүгү шын шииниң болуушкунун тургузуп, көрүкчүлерни сцена кырынга болуп турар үеже бүрүнү-биле хаара туда бээр — деп, республиканың немелде өөредилге хөгжүдер төвүнүң директору Татьяна Ефимова бодалы-биле үлешкен. — Тывада он школа болгаш немелде өөредилге албан черлери театрга херек дериг-херекселди, ооң иштинде прожекторларны, үн улгаттырар системаларны, микрофоннарны алган. Бо ажыл «Аныяктар болгаш уруглар» национал төлевилелдиң бир кезээ «Уругларга бүгү-ле экини» деп чаа федералдыг төлевилел езугаар уламчылаар».
Школа театрлары Виктор Көк-оол аттыг национал театр-биле кады ажылдап турарын демдеглезе чогуур. Профессионал артистер кичээлдерни, мастер-класстарны эрттирип, үнүүшкүннүг шиилерни организастап турар. 2015 чылдан эгелеп регионалдыг Өөредилге болгаш Культура яамылары «Театр дээрге бис» деп республиканың уругларның театр фестивалын болгаш мөөрейин организастаар. Чылдың-на аңаа аңгы-аңгы театр коллективтеринден ийи чүс ажыг школачылар киржип турар.