Владислав Ховалыг Москвага Россияның кадык камгалал сайыды Михаил Мурашко-биле ажыл-агыйжы байдалда ужурашкан. Кадык камгалалының баштайгы звенозун эде чаартыр регионалдыг программаның боттанылгазын, республиканың уруглар эмнелгезиниң тудуу канчаар чоруп турарын база туберкулезка удур эмнелге болгаш онкодиспансер тудар документиниң төлевилел-санаашкынын сайгарып көргеннер. Ол ышкаш федералдыг ведомстволар-биле кады ажылдажылга негеттинип турар айтырыгларны чугаалашкан.
Кадык камгалалының баштайгы звенозун эде чаартыр регионалдыг программа күүселдези-биле республикада эмнелге организацияларының материалдыг-техниктиг байдалын элээн экижидип, эвээш чурттакчылыг черлерде чаа объектилерни тудуп, эмнелге албан черлерин амгы үениң диагностика дериг-херекселдери-биле чепсеглээн. Бо чылдан эгелеп регионалдыг программа «Узун болгаш идепкейлиг назын» национал төлевилели-биле боттанып турар.
Регионга бо программа күүселдези-биле 2021 чылдан эгелеп кадык камгалалының 34 чаа тудуглары дужааттынган, 16 объектиге капитал септелгелерни чоруткан. Республиканың эмнелге организацияларында 39 санитар машиназын база 395 эмчи дериг-херекселдерин садып салган.
Бо чылын 12 объектиде тудуг ажылдары уламчылавышаан, кадык камгалалының беш тудуунда капитал септелге чоруп турар. 48 автомобильдерни база 179 эмчи дериг-херекселдерин саткаш, кадык камгалал организацияларынче үлээн.
Владислав Ховалыг биле Михаил Мурашко ол угланыышкынга ажылдар уламчылаар дээрзин демдеглээннер. Дараазында уруглар болгаш туберкулезка удур эмнелгелериниң, ол ышкаш онкология диспансериниң чаа тудугларының чорудуун сайгарган. Туберкулезка удур эмнелгени тударынче онза кичээнгейни салып турар, чүге дизе ону тударын Президент Владимир Путин дужааган.
Регионалдыг кадык камгалал яамызының дыңнатканы-биле алырга, республикада туберкулезка удур байдал берге хевээр. 2024 чылда чурттакчы чонга рентген шинчилелдерин көвүдеткенинден муниципалитеттерде аарыгның өзүлдези демдеглеттинген. Регион диагностика дериг-херекселдерин, ооң иштинде көжүп чоруур дериг-херекселдерни чаартырынче хөй акша-хөреңгини үндүрүп турар. 2022 чылдан бээр бо сорулгаларже барык 100 млн. рубль үнген. Профилактиктиг шинчилелдерни көвүдеткенинден, сөөлгү беш чылда туберкулезтан өлүп-хораары эвээжээн, 2024 чылда ол көргүзүг ооң мурнунда үе-биле деңнээрге 16 хуу баткан.
Тываның Баштыңы регионалдыг Кадык камгалал яамызы чаа туберкулез эмнелгезин тударының төлевилел-смета документациязын доосканын дыңнаткан. Онкология диспансериниң чаа бажыңының төлевилели база төнчү чадазында келген.
Уруглар эмнелгезиниң үш каът бажыңының тудуу «Кадык камгалалының инфраструктуразын хөгжүдери» федералдыг төлевилел езугаар чоруп турар. Төлевилел езугаар чаа объектини 150 орунга санаан. Уруглар эмнелгези үш салбырлыг болур, оон аңгыда психиатрия, хирургия, анестезиология болгаш реанимация, интенсивтиг терапия салбырлары көрдүнген. Тудугнуң ниити шөлү – 15 муң дөрбелчин метр ажыг. Эмнелге комплекизи беш адырдан тургустунар.
Владислав Ховалыг санитарлыг авиация албанының ажылын илеткеп тура, республиканың дыка хөй суурлары ыраккы, чедери берге черлерде болгаш, кижилерниң амы-тынын камгалаарынга санавиация дузазы кол черни ээлеп турарын демдеглээн. Бо чылын санитарлыг авиация бригадазы 83 ужудуушкунну кылып, 153 аарыг кижини камгалаан.
Республиканың кадык камгалал системазын хөгжүдер талазы-биле ажылды федералдыг чазак-биле сырый кады ажылдажылгалыг уламчылаарын республика Баштыңы ужуражылганың түңнелинде бодунуң блогунда дыңнаткан.