Чылдың-на октябрь 1-де делегейниң 100 ажыг чурттары Улуг назылыглар хүнүн демдеглеп турар. 1990 чылда КНО-нуң Чиңгине Ассамблеязының доктаалы-биле ол хүннү доктааткан болгаш, улуг назылыг кижилерге хүндүткелдиң база сагыш човаашкынның демдээ апарган.
Республиканың найысылалынга болгаш шупту кожууннарынга байырлалдың янзы-бүрү хемчеглерни эрткен. Кожууннар төптеринге болгаш Кызыл хоорайга байырлыг концерттер, хоочуннар төптеринге хөглээшкин- дыштанылга программалары планнаттынган. Октябрь 1-ден 7-ге чедир регионда эмнелге албан черлеринге ажык эжиктер хүннери эртер. Адырларның ведомстволары хоочуннарынга байырны чедирип, хүндүлеп, оларның ниитилелге киирген үлүүнүң чугулазын онзалап демдеглээн.
Регионалдыг Күш-ажыл болгаш социал политика яамызының дыңнатканы болза, Тывада 60 хардан өрү назылыг 34 муң хамааты чурттап турар. Оларның аразындан 28 муң ажыг кижи 74 хар четпээн, 4 муң хире кижи 75-89 харлыг, 200 ажыг кижи 90 хардан өрү назылыг, 100 хардан өрү назылыг 8 кижи бар.
Бо чылын «Демография» национал төлевилелден шилчээни «Өг-бүле» деп чаа национал төлевилелдиң «Улуг салгал» деп регионалдыг төлевилелиниң езугаар республика улуг назылыг кижилерге күрүне деткимчезиниң хемчеглерин көргүзүп турар. Национал төлевилел күүселдези-биле Кызылда улгады берген аарыг кижилер эмнээр болгаш профилактика талазы-биле регионалдыг гериатрия төвү ажылдап турар. Оон ыңай, халдавырлыг эвес социал аарыгларны тодарадырынче угланган эмчи шинчилгелерин, скринингилерни 2019 чылдан чорудуп турар.
Республиканың Күш-ажыл яамызының албан черлериниң ачы-дузалары улуг назылыг хамаатылар болгаш инвалидтер ортузунда нептереңгей. Социал- эмчи, өөредилге, психологтуг, социал-күш-ажыл болгаш юридиктиг дээш 80 хире ачы-дузаны көргүзүп турар. Назылап кыраан болгаш эвээш орулгалыг хамаатыларга чугула херек аъш-чем, хөмүр-даш болгаш одаар ыяш-биле хандырар сорулгалыг деткимче ажылдары уламчылавышаан.
2025 чылда чааскаан чурттап чоруур 298 улуг назылыг хамаатыларга болгаш инвалидтерге аъш-чем аймаан адрестиг дуза кылдыр көргүскен, 29 кижи хөмүрнү, одаар ыяшты 7 кижи алган. Чыл төнчүзүнге чедир 60 хире кижиге одаар хөмүр болгаш одаарты дүжүрер.