Октябрь 2-де Кызыл хоорайга, Россия Федерациязының камгалал сайыдының кубогу дээш спортчу хүрешке III делегей чергелиг маргылдаа эгелээр. Аңаа Россияның, Моолдуң, Иранның, Соңгу Көреяның, Белорусь Республиканың, Тунистиң, Иорданияның, Таджикистанның шериг командаларындан 100 ажыг шыырак мөгелер киржир. Командалар эмчи хыналдазын эрткен база шилиттинген мөгелерден тургустунган.
Эрткен маргылдааларга Россияның чепсектиг күштеринден болгаш найыралчы чурттардан 600 ажыг спортчулар киришкен. Хүндүлүг аалчылар кылдыр ат-сураглыг 40 ажыг мөге келген. Мөөрей 2023 чылда делегей чергелиг эрге-байдалды алган.
«Бо маргылдаа чүгле демисел эвес-тир. Ол дээрге хүн бүрүде бодунуң күрүнезиниң сонуургалдарын камгалап чоруур шериг албанныгларның күчү-күжүн, ат-алдарын, корум-чурумун, эрес-дидим чоруун көргүзери-дир» - деп, организакчылар демдеглээн.
Бо чылын маргылдаа октябрь 2-ден 6-га чедир болур. Октябрь 2-де командалар келгеш, турумчуп алыр. Октябрь 3-те тренировкалар, деңзилээшкин болгаш судьяларның ажылы. Октябрь 4-те эмчи хыналдазының соонда, баш бурунгаар салыглар эгелээр. Октябрь 5-тиң эртенинде маргылдаалар уламчылаар, 14 шак 30 минута турда төнчү салыглар болур. Октябрь 6-да командалар болгаш хүндүлүг аалчылар дедир аъттаныр.
57 кг-дан 130 кг чедир кол деңзилерлиг мөгелер ийи хевирге – грек-рим болгаш хостуг хүрешке – хууда-командалыг черлер дээш хүрежир. Салыглар делегей хүрежиниң (UWW) чурумнары-биле эртер.
Ат-сураглыг олимпийжи чемпионнар тус черниң спортчуларынга мастер-класстарны эрттирер. Октябрь 3-те КПКУ-га, октябрь 4-те Чадаана хоорайның күш-культура-кадыкшылга комплекизинге, октябрь 5-те Кызылдың «Юность» болгаш «Херел» спорт залдарынга мастер-класстар болур.
Бүгү хемчеглер республиканың амгы спортчу объектилеринге болуп эртер. Делегей чергелиг негелделерге дүүштүр айыыл чок чорук хемчеглерин, эмнелге албаннарының бүдүн хүнде хандырылгазы, организас-техниктиг үделгени хандырар.
Кызылга эртер делегей чергелиг маргылдаа аныяктар ортузунга спортту нептередир болгаш шериг албанныгларның күш-шыдалдыг, алдар-хүндүлүг, патриотчу чоруктуң эдилекчизи-дир деп эки овур-хевирин нептередир сорулгалыг. Элээди спортчуларга болгаш келир үениң Ада-чурт камгалакчыларынга солун ужуражылгалар хей-аътты оттурар ужурлуг деп организакчылар санап турар.
Эрткен чылдың маргылдаазынга Россияның чыынды командазы тиилээн болза, Беларусь Республика ийиги, а Моол, Казахстан база Тунис үшкү черлерни үлешкенин сагындыраал.