Тыва 2025 чылда лифт солуур планын дөрт катап көвүдедип, 5 лифтиниң орнунга 22 эрги лифтини чаарткан. Федералдыг бюджеттен чээлилер-биле регионнарга өрелерин үндүр бижиир чаа дүрүм ачызында лифт дериг-херекселдерин солуур ажылды дүргедедир аргалыг болган. Россияның президентизиниң саналы-биле, бо чылдан эгелеп хөй квартиралыг бажыңнарда лифттерни септеп, солуур ажылдарны үндүр бижиириниң байдалдар даңзызынче киирген.
Тываның Чазаа Кызылда хөй аалдыг тос бажыңда 36 лифтини солуур чарыгдалдарны бюджет чээлизин үндүр бижиир чагыынче кииргеш, немелде дузаны алган. Федералдыг эрге-чагырга чээли өрезиниң чамдыызын үндүр бижип турда хосталган акша-хөреңгиден 123,7 млн. рубльди ол сорулгаларга ажыглаарын чөпшээреп, республиканың чагыын бадылаан.
Ооң мурнунда республиканың лифт инфраструктуразын Капитал септелге фондузунуң чыылдазы-биле чүгле хөй аалдыг бажыңнар чурттакчыларының төлевири-биле чаартып турганын сагындыраал. Ынчангаш, ажыл-херек чурттакчыларның идегеп турганындан оожум болуп, чылда ортумаа-биле 5-6 лифт септеп турган.
Ам акшаландырыышкынның доктаамал дөзү бар апарганда, ажыл элээн дүргедээринге ТР-ниң Тудуг яамызы бүзүреп турар. Бо чылын Бай-Хаакская кудумчузунда 8 база Кочетов кудумчузунда 55/2 дугаарлыг тос каът бажыңнарда беш эрги лифтини солуурун планнаанындан аңгыда, Ангарский бульварда 8 биле 10 дугаар бажыңнарда, ол ышкаш Лопсанчап кудумчузунда 37/3 бажыңнарда база 17 лифтиниң көдүртүр херекселдерин чаартыр.
2026 чылда Ангара бульвары 31, Бай-Хаак кудумчузу 6 база Лопсанчап кудумчузунуң 43 дугаарлыг бажыңнарынга сес лифттерни солууру көрдүнген. Бай-Хаакская кудумчузунуң 2 дугаарлыг бажыңында хөй квартиралыг бажыңга 6 чаа лифттерни чаартып, программаны 2029 чылда доозар.
2025 чылдан 2029 чылга чедир ниитизи-биле 130,69 млн. рубльди хөй аалдыг тос бажыңнарда 36 лифтини солуурунче угландырар. Ооң 123,69 млн. рубли – республиканың үндүр бижээн чээлизинден деткимче болган болза, а 7 млн. рубли – квартира ээлеринден чыгдынган акша-хөреңгизи болур.