Бөгүн, сентябрь 30-де, “Сибирь дугуржулгазы” регионнар аразының ассоциациязының өөредилге болгаш эртем талазы-биле координация чөвүлелиниң чанында Сибирьниң болгаш Ыраккы Чөөн чүк чоннарының төрээн дылдарының талазы-биле ажылчын бөлүктүң кежигүннери республиканың найысылалынга чедип келгеннер. Олар 2025 чылда Тывага болуп эртер Сибирь болгаш Ыраккы Чөөн чүк регионнарының чоннарының төрээн дылдарын деткиир болгаш сайзырадыр талазы-биле ээлчеглиг үнүүшкүннүг хуралга киржирлер. Саха-Якут Республиканың Эртемнер академиязының төрээн дылдар шинчилээр, кадагалаар болгаш сайзырадыр төптүң удуртукчузу - педагогика эртемнерниң доктору Феодосия Габышева хуралды башкарар.
Октябрьның 1-де Чазак бажыңынга республиканың, Дээди Хуралдың (парламентиниң) удуртулгазы база Тыва Республиканың Өөредилге яамызының киржилгези-биле ажылчын бөлүктүң хуралы болуп эртер. Аңаа Тыва, Алтай, Хакас, Бурят, Саха (Якутия) республикалардан, Забайкалье крайдан эртемденнер болгаш башкылар киржир. Ол ышкаш Иркутск, Сахалин, Кемерово областардан база Москва, Барнаул, Мурнуу-Сахалин хоорайлардан делегациялар келир ужурлуг.
Бөгүн Кызылга келген хүндүлүг аалчыларны Тыва Республиканың өөредилге сайыдының хүлээлгезин күүседип турар Орлан Соян уткуп алгаш, бистиң регионче онза кичээнгейи дээш өөрүп четтиргенин илереткен:
«Бистиң республикавыска Ажылчын бөлүктүң ээлчеглиг үнүүшкүннүг хуралын эрттирери, ооң ажыл-чорудулгазы болгаш эгелээшкиннери – чүгле Сибирь болгаш Ыраккы Чөөн чүктүң эвес, а хөй националдыг чуртувустуң келир үези дээш ажыл-дыр».
База ол ышкаш Сибирь дугуржулгазы регионнар аразының ассациациязының координация чөвүлелинде Ажылчын бөлүктүң киржилгези-биле «Сибирь болгаш Ыраккы Чөөн чүк чоннарының төрээн дылдарын башкылаары: теориязы, практиказы болгаш келир үези» деп регионнар аразының эртем-практиктиг конференциязы бо хүннерде Кызылга болуп эртер. «Сибирьниң болгаш Ыраккы Чөөн чүк чоннарының төрээн дылдарын сайзырадырының айтырыглары» база «Этнокультурлуг эртемнерни өөредири» деп ийи секция планнаттынган. Аңаа Сибирьниң болгаш Ыраккы Чөөн чүктүң эртемденнери болгаш башкылары төрээн дылдарны кадагалап арттырарының болгаш сайзырадып хөгжүдериниң айтырыгларын сайгарып чугаалажыр. Салым-чаяанныг уругларның «Сылдысчыгаш» төвүнге база Тываның күрүне университединге секциялар ажылдаар.