Амгы Россияның төөгүзүнде сентябрьның 30 – онзагай хүн, Донецк Улус Республиканың, Луганск Улус Республиканың, Запорожье облазының база Херсон облазының Россия Федерациязынга катап каттышканының хүнү. Тываның Баштыңы бо уттундурбас хүнде республиканың чурттакчыларынга амыр-тайбыңны, чечектелиишкинни, даартагы хүнге бүзүрелди күзээн. Республикада Донбасс биле Новороссияның төөгүзүн сактып, элээн каш хемчеглер бо хүнде эртип турар.
«Бөгүн Тыва Республика бүгү чурт-биле кады – Россияның Донецк Улус Республика, Луганск Улус Республика база Запорожье болгаш Херсон областар-биле катап каттышканының хүнүн демдеглеп турар. Миллион-миллион кижилерниң Россия-биле кады болур дээн тура-соруун боттандырган төөгүлүг шынның болуушкуну кылдыр бистиң Ада-чуртувустуң төөгүзүнче ол кезээ мөңгеде кирген. Бо хүнде Россияның күжү ооң чоннарының чаңгыс деминде дээрзин кажангызындан-даа артык медереп билип турар бис» - деп, Владислав Ховалыг чугаалаан.
Чаа-чаа чедиишкиннерниң болгаш тиилелгелерниң дөзү – регионнарның найыралында деп, республиканың баштыңы демдеглээн.
Тыва Республика Енисей Сибириниң регионнары – Красноярск край болгаш Хакас Республика-биле кады Луганск Улус Республиканың Свердловск муниципалдыг районунга шефтээшкин дузазын көргүзүп турар. Бистиң республика муниципалдыг округтуң социал инфраструктура объектилерин чаартырынга дузалажып турар. Бо чайын Тывадан бригада Свердловскиниң 2 дугаар ортумак школазынга капитал септелгени кылган. Ооң мурнунда тыва тудугжулар Свердловскиниң 6 дугаар ортумак школазын катап тургузарынга база Червонопартизанск хоорайның 15 дугаар уруглар садының эде чаартырынга үлүг-хуузун киирген.
Бөгүн республикада элээн каш хемчеглер тураскаалдыг бо хүнге тураскаадып болуп турар. Бөгүн Кызылдың Аныяктар сесерлиинге республиканың ниитилел-политиктиг болгаш аныяктар каттыжыышкыннарының киржилгези-биле митинг-концерт болуп эрткен. Ол хемчег чүс-чүс хоорайжыларны болгаш идепкейжилерни чыып, патриотчу ырылар болгаш байырлалдың кыйгылары-биле Донбасстың база Новороссияның чурттакчыларынга деткимчезин илереткеннер.
Тиилелге шөлүнге аныяктар болгаш волонтерлар организациялары #Россия89 флэшбомну организастаан. Флэшмобнуң киржикчилери 89 деп сан кылдыр чыскаалыпкаш, Россияның шупту регионнарының чаңгыс деминиң сүлдезин көргүскен.
Өөредилге черлери Донбасс болгаш Новороссияны хостаарынга киришкен тускай шериг операциязының киржикчилери база хосталган девискээрлерде социал объектилерни катап тударынга үлүг-хуузун каткан студент отрядтар кежигүннери-биле ужуражылгаларны эрттирген.
Республиканың техникумнарында болгаш школаларында ДУР, ЛУР, Херсон, Запорожье областарның төөгүзүнге, культуразынга болгаш маадырлыг чоруунга тураскааткан “Үениң харылзаазы: Донбасс база Новороссия” деп интерактивтиг аян-чорук кичээлдери болгулаан.
Эрткен неделяда Кызылга Донецк Улус Республиканың Горловканың ойнаар-кыстар театры гастрольдаан. ДУР-дан артистер «Братец Кролик» база «Планета Вити» деп шиилерни тыва көрүкчүлерге бараалгаткан.
«Россияның дайынчы алдар болгаш тураскаалдыг хүннериниң дугайында» федералдыг хоойлуже кирген өскерилгелер езугаар, 2023 чылдың сентябрь 28-те, Россияже Донецк Улус Республика, Луганск Улус Республика, Запорожье болгаш Херсон областарның катап каттышканының хүнүн демдеглеп турар. 2023 чылдан бээр бо төөгүлүг хүннү демдеглээри чаңчыл апарган.
2022 чылдың бо хүнүнде, РФ-тиң Президентизи Владимир Путин база Донецк биле Луганск Улусчу Республикаларның, ол ышкаш Запорожье биле Херсон областарның баштыңнары Россияның составынче ол регионнарның кирериниң дугайында делегей чергелиг керээлерге атты салганнар.