Регионалдыг диспетчер албанының дыңнатканы-биле алырга, республика девискээринде 66,6 га шөлдүг үш арга-арыг өрттери хып турган, 62,5 га черде ийи өрт хыппышаан, 4,1 га черде бир өрт өжүртүнген. Өртке удур онза чурумну октябрь 8-ке чедир узаткан болзажок, республика девискээринде арга-арыг өрттери хып турарын барымдаалааш, арга-арыг камгалал албан черлери арга-арыг өрттериниң айыыл чок чоруунуң дүрүмнерин хажыткан кижилерни илередир талазы-биле хемчеглерни күштелдирер.
Тываның Арга-арыг яамызының дыңнатканы-биле алырга, Кызыл кожууннуң Ээрбек суурдан соңгу-барыын талазынче 30-ки км-де база Черби суурдан мурнуу-чөөн чүкче 15 км черде арга-арыг өрттери хып турар. Өрттер өжүреринде 55 кижи база 11 техника киржип турар. Таңды кожуунда өрттү он алды кижиниң болгаш дөрт техниканың күжү-биле өжүрген. Баштайгы медээлерден алырга, шупту девискээрлерде өрттерниң үнген чылдагааны тус черниң чурттакчыларында деп айыткан.
Тыва Республиканың Чазааның Даргазының арга-арыг ажыл-агыйын база хайгаарап турар оралакчызының хүлээлгезин күүседип турар Уран-оол Ондар өртке удур айыыл чок чоруктуң негелделерин болгаш чурумун үрээннерге административтиг кеземчени онааштырар дугайында хөй-ниити дыңнадыышкын кампаниязын күштелдирер даалганы муниципалдыг удуртукчуларга берген. Чазак Даргазының оралакчызы кызыгаарлаашкын чурумун хажыдып турар кижилерни илередири-биле рейдилерни күштелдирерин база демдеглээн.
Арга-арыг ажыл-агый болгаш бойдус ажыглал сайыды Григорий Ондар өрт сезону эгелээнден бээр арга-арыг инспекторлары 2000 ажыг рейдилерни чоруткан, ооң түңнелинде өртке удур айыыл чок чоруктуң онза чурумун хажытканы дээш 55 административтиг протоколдарны долдурганын дыңнаткан. Республикада арга-арыгже киреринге кызыгаарлаашкыннарны уламчылап, өртке удур айыыл чок чоруктуң тускай чуруму күштүг хевээр артканын ведомствонуң удуртукчузу сагындырган. Арга-арыг фондузунуң черлеринче чүгле тускай чөпшээрел-биле кирип болур. Чөпшээрел алыр дизе, республиканың арга-арыг болгаш бойдус яамызынче азы кожууннуң арга-арыг ажыл-агый эргелелдериниң кайызынче-даа барып болур.
Өртке удур айыыл чок чоруктуң тускай чурумунуң үезинде, хамаатыларга одаг кыпсырын, бок өрттедирин, өрт үнүп болур өске-даа ажылдарны хораан. Өртке удур айыыл чок чоруктуң бо негелделерин хажытканы дээш административтиг торгаалдарга онаажыр: хуу кижилерни 10-дан 20 муң рубль чедир, албан-дужаалдыг кижилерни 30-60 муң рубль чедир, а юридиктиг черлерни 400-800 муң рубль чедир торгаар.