Владислав Ховалыг Тывадан физика башкызы Айдаш Хертектиң «Россияның чылдың башкызы-2025» деп башкылаашкын ажылының тергииннериниң бүгү-российжи мөөрейинге «Бойдус эртемнериниң өөредилгезин хөгжүдери дээш» деп номинацияга тиилекчи болганын бодунуң блогунда дыңнаткан. Ол дээрге регионга көскү чедиишкин-дир деп, республика баштыңы демдеглээн.
Республика Баштыңы башкыга төлептиг тиилелгези-биле байырын чедирип, башкылаашкын ажылынга моон-даа соңгаар чедиишкиннерни, чаа-чаа тилелгелерни күзээн.
Сентябрь 20-де Санкт-Петербург хоорайда «Чылдың башкызы-2025» бүгү-российжи профессионал мөөрейниң түңнел чадазы эгелээн. Мөөрей үезинде Россияның шупту регионнарын төлээлеп келген 89 шылгараңгай башкылар планнаттынган программа езугаар бодунуң эртеминге кичээлдерни эрттирген. Мөөрейниң ийиги шенелдези - «Педагогиктиг интервьюда» жюри кежигүннери финалчылар-биле ажык чугааны чоруткан.
Мөөрейниң кол шылгалдалары сентябрь 24, 25, 26 хүннеринде болуп эрткен. А сентябрь 26-да кичээл эрттирер сөөлгү мөөрей болуп эрткен.
«Бойдус эртемнериниң өөредилгезин хөгжүдери дээш» деп номинацияда тиилээнимге дыка өөрүп тур мен. Мээң ынак эртемим физика болганда, ол угланыышкынны шилип алган мен. «Россияның чылдың башкызы-2025» деп бүгү-российжи деңнелдиг мөөрейге мээң кичээлимни болгаш мени үнелээнинге өөрүп тур мен» - деп, башкы бодунуң чедиишкинин тайылбырлаан.
Айдаш Александрович бо мөөрейге белеткешкен башкы эш-өөрүнге өөрүп четтиргенин илереткен: «Силерниң арга-сүмеңер ачызында, мөөрейге белеткенип, кичээлимни нарынчыткан мен. Сеткилим ханызындан база катап улуу-биле четтирдим!»
Бо чылдың сентябрь 1-де эжиктерин ажыткан Кызыл кожууннуң Каа-Хем хоорай хевирлиг суурда 3 дугаарлыг чаа школаның физика башкызы болгаш директору Айдаш Хертек – «Чылдың башкызы 2025» мөөрейниң регионалдыг чадазынга тиилээнин сагындыраал. Ол дээди мергежил категориялыг болгаш чеди чыл стажтыг башкы.
«Россияның чылдың башкызы» мөөрей 1990 чылда эгелээн. Мөөрей өөредилгениң башкылаашкын ажылының чаа аргаларын болгаш технологияларын боттандырарынга, арга-дуржулгазын, билиглерин кады ажылдап турар эш-өөрү-биле үлежип, салым-чаяанныг аныяктарны боттарының үлегери-биле хаара тударынга белен башкыларны тодарадырынга дузалаар. Мөөрейниң эгезинден бээр элээн каш муң специалистер депшип ажылдаар аргаларны ап, мергежилин бедидип, профессионал арга-дуржулгазын экижиткен.