Тываның Баштыңы сарыг шажынның делегей чергелиг III шуулганының үезинде, Россия Федерациязының Чазааның Даргазының оралакчызы Дмитрий Чернышенко-биле ажылчын байдалда ужурашкан. Ужуражылга үезинде Россияның Чазааның вице-премьери Тывада эртем, өөредилге, аныяктар политиказы, туризм, спорттуң хөгжүлдезиниң дугайында Владислав Ховалыг-биле чугаалашкан.
«Бистиң Президентивис Владимир Владимирович Путинниң онзалап демдеглеп турары-биле алырга, Тываның арга-шинээ аажок улуг, ону чедимчелиг ажыглаары чугула. Мында специалистерниң өөредилгези болгаш белеткели кол черни ээлеп турар» - деп, Дмитрий Чернышенко демдеглээн.
Чазак Дарганың оралакчызы бурунгаар хөгжүлдеде республиканың чедиишкиннерин, школаларга болгаш уруглар садтарынга 11 муң хире чаа олуттарның ажыттынганын база чаарттынып септеттинген 48 школаларны чижек кылдыр айыткан. Тывада өөредилге инфраструктуразының тудуу уламчылавышаан: «Өзүлдениң точказы»-биле 144 өөредилге төптери, уругларга «IT-куб» сан-чурагайлыг өөредилге төвү база «Кванториум» технопарктарның ажыттынган, республиканың хереглели-биле инженер-техниктиг, педагогиктиг мергежилдерге студентилерни белеткеп турар.
«Профессионалитет» федералдыг төлевилел чорудуу-биле регионга мурнады көөр угланыышкыннар: тудуг, даг-болбаазырадылга, көдээ ажыл-агый талазы-биле үш кластер тургустунган.
Ужуражылгага спорт айтырыгларынче онза кичээнгейни салган.
«Дмитрий Николаевич бо угланыышкыннарда ажылывыстың үре-түңнелдерин демдеглээн. Ылаңгыя, республика спортта эки көргүзүглерлиг: 2024 чылдың төнчүзүнге чедир спортче доктаамал хаара туттунган хамаатыларның деңнели 58 хуу, а спортчу оран-сава-биле хандырылга 82 хуу четкен - деп, ужуражылга соонда Владислав Ховалыг социал четкилерде бодунуң блогунда бижээн. - Федералдыг чазактың бистиң регионнуң хөгжүлдезинге деткимчезин улуг өөрүп четтириишкин-биле демдеглексеп тур мен. Республиканың күчү-күжүн долузу-биле ажыглаар дээш бүгү күжениишкиннерни салып турар бис».
Дмитрий Чернышенко Россияның Президентизи Владимир Путинниң Тываның туризм адырын регионнуң байлак, солун, онзагай бойдус хүрээлеңи-биле холбаалыг эң-не перспективтиг адырның бирээзи деп үнелээн. Ол ышкаш «Туризм болгаш аалчылар хүлээп алыышкыны» национал төлевилелге республиканың идепкейлиг киржилгези-биле солун турисчи программаларны сүмелеп, амгы үениң инфраструктуразын тургузуп, аян-чурукчу агымнарны хандырары регионнуң кол сорулгаларының бирээзи деп санаан.
Тываның Баштыңы Россияның Чазааның бүгү талалыг деткимчези болгаш идепкейлиг кады ажылдажылгазы-биле айыттынган сорулгаларны чүгле чедип алыр эвес, а республиканың хөгжүлдезин чаа деңнелче көдүре бээринге бүзүрелин илереткен.