Бүгү-делегейниң туризм хүнүн чылдың-на сентябрь 27-де демдеглеп турар. 1979 чылда Испанияның Торремолинос хоорайга, Бүгү-делегейниң туризм организациязының Чиңгине Ассамблеязы ол хүннү бадылаан. Россияга ону 1983 чылдан демдеглеп эгелээн. Туризмни нептередири, ооң делегей экономиказынга ужур-дузазын көргүзери, делегей чергелиг харылзааларны быжыглаары – байырлалдың кол сорулгазы.
Тываның Баштыңы Владислав Ховалыг республиканың чурттакчыларынга болгаш аалчыларынга Бүгү-делегейниң туризм хүнү-биле байырны чедирген. Бо байырлал аян-чорукчулаарынга, чаа черлер ажыдарынга, сактыышкыннары-биле үлежиринге ынак кижи бүрүзүн каттыштырып турар деп, ол демдеглээн.
"Бистиң регионнуң турисчи арга-шинээ аажок улуг. Тываның онзагай бойдус чурумалы, байлак культуразы, езу-чаңчылдары аян-чорукчуларны сорунзалай тырттып турар. Төрээн черивисче дыштанып, таныжып кээп турар аалчыларга таарымчалыг байдалдарны тургузар дээш чүткүп турар бис" - деп, Ховалыг бодунуң дыңнадыында бижээн. Ол туризм адырының шупту ажылдакчыларынга кызымаккай ажылы, бедик мергежили, бердингени дээш өөрүп четтиргенин илереткен. «Силерниң күжениишкиннериңер-биле бистиң республикавыстың каас-чаражын, бот-онзагайын билип ап турар кижилерниң саны көвүдээн» - деп, Баштың немээн.
Владислав Ховалыг туризм адырының ажылдакчыларынга чедиишкиннерни, чаа төлевилелдерни, өөрүп четтирген аалчыларны, а аян-чорукчулаарынга ынактарга солун маршруттарны, чырык сактыышкыннарны болгаш уттундурбас ужуражылгаларны күзээн. «Тывага аян-чорууңар силерниң чүректериңерге уттундурбас чылыг исти арттырар болзун» - деп, республика Баштыңы күзээн.
Сөөлгү чылдарда Тывада турисчи инфраструктура элээн экижип, аян-чорукчуларга — Россияның өске регионнарындан болгаш даштыкы чурттардан келген аалчыларга ачы-дуза чедирилгезиниң саны көвүдээнин эксперттер демдеглеп турар.