Чылдың-на сентябрьның сөөлгү субботазында Енисей хүнүн демдеглеп турар. Бойдустуң кайгамчык байлаа болур Енисейни камгалалынга болгаш бойдус хүрээлеңин кадаглап артырарынга ол тураскааттынган.
Бо чылын ону чаңчыл ёзугаар субботник хүнү-биле демдеглээн, аңаа 600 ажыг кижи киришкен. Енисей хемниң эриин дургаар арыглаарынга киришкен актвичилерниң аразында регионалдыг ведомстволар ажылдакчылары, волонтерлар, буян сеткилдиг хамаатылар бар.
Акция Кызылдың «Азия төвү» скульптура комплекизинге эгелээн, аңаа чогаадыкчы бөлүктер субботник хүнүнүң киржикчилеринге оюнун бараалгаткан. Эко-активчилер Улуг-Хемден туткан балык мүнү-биле чемгерип, киржикчилерни демнештирип, найыралчы байдалды тургускан. Экологтуг акцияга кожууннар чурттакчылары база катчып, Улуг-Хемни дургаар база аңаа хамаражыр хемнер-хөлдерниң эриктерин аштап-арыглаан.
Енисей хүнүн бир дугаар 2011 чылда Красноярск крайга демдеглээнин сагындыраал. 2012 чылдан эгелеп байырлалга Тываның, Хакасияның, Красноярск крайның чурттакчылары катчып, күчүлүг улуг хемге хамааржыр регионнарның экосистемазынга болгаш культурлуг өнчү салгалынга, ол ышкаш бойдуска болгаш келир салгалдарга ооң ужур-дузазын онзалап демдеглээн.