Чылдың-на бүгү чуртта эртип турар «Арга-арыгны камгалаалыңар» акция-биле Тывага 2,6 миллион ажыг ыяш өзүмнерин тарыыры планнаттынган. Ермаковск арга-арыг питомнигинден эккелген хады өзүмнерин Таңдының арга-арыг ажыл-агыйның девискээринде олуртуп эгелээн. Тываның арга-арыг болгаш бойдус сайыды Григорий Ондарның дыңнатканы-биле алырга, акцияда яамының болгаш арга-арыг ажыл-агыйларының ажылдакчыларындан аңгыда, республиканың ИХЯ ажылдакчылары база «Экосистема» шимчээшкининиң волонтерлары киржип, 14,4 гектар черде 57 муң ажыг өзүмнерни олурткан.
Тывада «Арга-арыгны камгалаалыңар» акция күс төнчүзүнге чедир уламчылаар. ТР-ниң Бойдус яамызы студентилер, школачылар, организациялар болгаш бүдүрүлгелер ажылдакчыларының болгаш арга-арыгны катап тургузарынга үлүг-хуузун киирер күзелдиг кандыг-даа кижилерниң киржилгези-биле 20 хире эки турачы улуг үнүүшкүннерни организастаарын планнаан. Ниитизи-биле 2,6 миллион ыяш өзүмнерин олуртур кылдыр 1 муң гектар ниити шөлдүг 23 участокту республика девискээринде аңгылаан.
Сентябрь 23-түң хүнүнге чедир, Тывада 2,3 млн. ажыг өзүмнерни олуртканын бүгү-российжи акцияның сохранимлесрф.рф/ албан езузунуң сайтызында дыңнаткан. Айыттынган планны күүседир дизе, республика ам-даа 300 муңдан эвээш эвес ыяш өзүмнерин олуртур.