Владислав Ховалыг амгы үеде Калмыкияның найысылалы Элистада эртип турар III-кү делегей чергелиг буддийжи форумга хүндүлүг аалчы болуп киришкен. Форумнуң ажыдыышкын хүнүнде, Калмык Республиканың Баштыңы Бату Хасиков, Бурят Республиканың Баштыңы Алексей Цыденов-биле ужуражылга үезинде, көдээ ажыл-агый, культура, өөредилге болгаш өске-даа угланыышкыннар талазы-биле республикалар аразында Дугуржулганы боттандырарының планынга атты салган.
«Калмык Республикада болуп эртип турар III делегей чергелиг буддийжи форумда киржип келдим. Бо дээрге чүгле сарыг шажын эдерикчилеринге эвес, а шажын-чүдүлге хөгжүлдезинге болгаш культурлуг өнчү-хөреңгиге сонуургалдыг кижилерге онзагай болуушкун-дур. Арга-дуржулга солчулгазынга, кады ажылдажылганың перспективаларын сайгарарынга, регионнар аразында культурлуг харылзааны ханыладырынга бо хемчег онзагай арганы берип турар» - деп, Владислав Ховалыг бодунуң блогунда бижээн.
Үш талалыг ужуражылга үезинде сарыг шажын парктарын тургузар төлевилелдиң таныштырылгазы база болган. Калмыкияның Баштыңы Бату Хасиковтуң демдеглээни-биле алырга, ол идеяның боттаныышкыны келир салгалдарга ыдыктыг черлерни арттырар күзелдиг сарыг шажынга чүдүп чоруур төрел чоннарның чүткүлүн илередип турар.
3-кү делегей чергелиг буддийжи форум сентябрь 25-тен 28-ке чедир Калмыкияның найысылалынга болуп эртер. Ында бизнес болгаш культура программалары хөй.
Делегейниң 30 ажыг чурттардан: Кыдат, Шри-Ланка, Бангладеш, Непал, Камбоджа, Мьянма, Көрей Республика, Белоруссия, Сербия, Казахстан, Кыргызстан, Таджикистан, Моол, Бразилия, Бутан, Испаниядан делегациялар форумда киржип турар. Россияның буддийжи регионнары – Бурятия биле Тыва база бо болуушкунда каттышкан.
Форумнуң байырлыг ажыдыышкыны Элистада тускай дериттинген «Көшкүн чоннарның шөлү» шөлге болуп эрткен. Хемчег калмык тоолчургу чугааларга үндезилеттинген мультимедийлиг шоудан эгелээн, аңаа Калмыкиядан болгаш өске-даа регионнардан, ооң иштинде Тывадан ат-сураглыг чогаадыкчы коллективтер киришкен.
«Минhн байр» (Муң-муң өөрүшкү) делегей чергелиг уран чүүл фестивалын ажыткан концертке Тыва Республиканың «Саяннар» национал хөгжүм болгаш танцы театры, «Байкал» болгаш «Тюльпан» ансамбльдер, Синьцзян-Уйгур автономнуг облазының база Моолдуң артистери киришкен.
Форум амгы үеде сарыг шажынның хөгжүлдезиниң, сүлде-сүзүк өнчүзүн кадагалап арттырарының, культуралар аразында харылзааны быжыглаарының, эп-найыралды болгаш тайбың амыдыралды нептередириниң талазы-биле чугаалажыр шөл апаар сорулгалыг.
Тыва Республиканың IV делегей чергелиг буддийжи форумну Тывага эрттирер дээн эгелээшкини Россияның Президентизи Владимир Путинниң болгаш буддийжи өөредилгени болгаш эртем-шинчилелди деткиир фондунуң деткимчезин алган.
Февраль 13-те Москвага «Буддийжи өөредилгени болгаш эртем-шинчилелди деткиир» фондунуң Хайгаарал чөвүлелиниң хуралында, «Чаңчылчаан буддизм болгаш амгы шагның айтырыглары» деп IV делегей чергелиг сарыг шажын шуулганын Тывага эрттирер дугайында шиитпир хүлээп алдынган.
Республикада улуг хемчээлдиг хемчегге белеткел ажылдары эгелей берген. Республиканы болгаш ооң найысылалын аалчылар хүлээп алырынга бүрүнү-биле белеткээр ажыл-агыйжы программа болгаш хемчеглер киирген “орук картазын” амгы үеде ажылдап кылган.