Сентябрь 23-те Россияда «Амыдыралга инфраструктура» национал төлевилелдиң деткимчези-биле «Айыыл чок оруктар» онлайн олимпиада алды дугаар болуп эртер. Аңаа 1-9 класстарның школачылары башкылары азы ада-иелери-биле кады киржип болур.
Тыва Республиканың Орук-транспорт яамызы орук шимчээшкининиң дүрүмнерин эки билип алырынга дузалыг олимпиадага идепкейлиг киржиринче өөреникчилерни, оларның ада-иелерин болгаш башкыларны кыйгырган.
2020 чылдан бээр Тыва Республикадан 24000 хире киржикчи бо олимпиадага киришкен, а эрткен чылын Тывадан тос муң хире школачы билиин көргүскен. Чылдың-на олимпиада киржикчилериниң саны немежип турар.
2023 чылда муниципалдыг тургузуглардан – Эрзин, Тес-Хем, Улуг-Хем, Сүт-Хөл, Чеди-Хөл, Таңды, Тожу база Өвүр кожууннар, Ак-Довурак хоорай олимпиадага идепкейин көргүзүп, 74 школачы тиилээш, тускай шаңналдарны алган.
"Орук дүрүмнерин бичиизинден тура билири чугула. Уруглар олимпиаданың даалгаларын күүседип тургаш, орукту айыыл чок кежерин, хөй-ниити транспортун каяа манаарын, караңгы үеде чолаачыларга көскү болур кылдыр чырыыр чүүлдерни ажыглаарын шиңгээдип алырлар. Оон аңгыда орук шимчээшкинин билип, айыылдыг байдалдарны сайгарып өөренирлер" - деп, республиканың орук-транспорт сайыды Шораан Чыргал-оол чугаалаан.
Бо чылын олимпиада 2025 чылдың сентябрь 25-тен 26-га чедир чаңгыс чадага эртер.
Дараазында шөлүгже: dorogi.uchi.ru (dorogi.uchi.ru/) киргеш, Олимпиада дугайында медээни билип, даалгаларны күүседиринче кирип болур.
Даалгаларны күүседирде, бо сайтыже dorogi.uchi.ru (dorogi.uchi.ru/) шилчээш, долдурар азы УЧИ.РУ платформага бүрүткедири албан.
Бир эвес өөреникчиниң УЧИ.РУ платформаже кирер эргези бар болза, олимпиадага киржирде дараазында чүүлдерни кылыры чугула:
- dorogi.uchi.ru (dorogi.uchi.ru/) шөлүгже кирер;
- кирерде бодунуң логин база паролюн айтып, даалгаларны күүседип эгелээр.
Бир эвес башкының УЧИ.РУ платформаже кирер аргазы чок болза, олимпиадага киржирде дараазында чүүлдерни кылыр апаар:
- dorogi.uchi.ru (dorogi.uchi.ru/) шөлүгже кирер;
- бүрүткелди эрткеш, клазын база өөреникчилерин немээр;
- платформаже киреринге уруг бүрүзүнге хуу логинин база паролюн үлеп бээр.
Ооң соонда өөреникчилер боттарының хууда кабинеттеринден онаалгаларны күүседип эгелээр.
Онлайн олимпиада дээрге өөреникчилерге билдингир болгаш сонуурганчыг хевирге белеткээн бөлүк интерактивтиг өөредилге тестилери-дир. Оларны орукка айыыл алдынарының эге билиглерин хынаарынче угландырган.
Хемчег төне бээрге-ле, хууда кабинеттеринге ооң түңнели көстү бээр. Олимпиадага киришкен шупту өөреникчилер сертификаттарны алыр, а тиилекчилерге дипломнар болгаш хүндүлел бижиктерни тыпсыр.