Тываның эмнелге албан черлериниң техниктиг баазазын экижидери уламчылавышаан. Улуг-Хемниң кожууннар аразының медицина төвүнде озал-ондак болгаш хан-дамыр аарыгларының соонда аарыг кижилерге эмчи реабилитациязын эрттиреринге чаа тускай дериг-херекселдерни садып алган. «Идепкейжи узун назын» национал төлевилелдиң кезээ болур «Кадыкшылды катап тургузарынга дээштиг эмчи реабилитациязы» федералдыг төлевилел күүселдези-биле дериг-херекселдерни садып салган.
Улуг-Хемниң кожууннар аразының эмнелге төвүнде бир дугаар ажыттынып турар реабилитация салбырында узунун хемчээр тускай эмчи херекселин, криотерапия дериг-херекселин, бедик частоталыг (УВЧ) терапияны, хөй ажыглалдыг электрилиг орунну, вакуум-роликтиг массаж аппаратын болгаш өске-даа тускай эмчи дериг-херекселдерин саткан.
"Кадыкшылды катап тургузарынга дээштиг эмчи реабилитациязы" программа езугаар “Серебрянка” санаторийинге, Кызылдың эмнелгелеринге, Уругларның катап тургузуушкун медициназы болгаш реабилитация төвүнге база баштайгы эмчи албан черлеринге ындыг дериг-херекселдерни садып алганын демдеглээри чугула. Бо чылын Тывада эмнелге албан черлеринче ниитизи-биле 207 санныг дериг-херекселди чедирген, ооң 180-ин аарыг кижилерниң реабилитациязынга ажыглаар.