Эрткен неделяда Тываның Чазаа 2025 чылдың сентябрь 18-тен октябрь 8-ке чедир өрт онза чурумну узадырын шиитпирлээн. Онза чурум үезинде республиканың арга-арыг фондузунда арга-арыглыг девискээрлеринче кирерин кызыгаарлаар болгаш өртке удур айыыл чок чорук дүрүмнерин сагыырын хандырар немелде хемчеглерни киирген. Хамаатыларга одаг кыпсыры, бок өрттедири, өрт үндүрүп болур өске-даа ажыл-херектерни кылыры хоруглуг.
Тываның Баштыңы Владислав Ховалыг бодунуң блогунда түр када кызыгаарлаашкыннарны билип алырын чаңгыс чер чурттугларындан дилээн. "Бо хемчеглер арга-арыгларывысты болгаш ооң чурттакчыларын камгалаарынга херек. Арга-арыгларывыстың келир үези бистиң кижи бүрүзүнден хамааржыр. Бойдусту камнап кадагалаары – келир салгалдарның чаагай чоруунче үлүг-хуу-дур" - деп, ол айыткан.
Россияның Онза байдалдар яамызының Тыва Республика талазы-биле төп эргелели хамаатыларга ажык отту (одаг, мангал, дуңзаалаар, быжыртынар херекселдер) ажыглаарын хораанын дыңнаткан. Өртке удур айыыл чок чоруктуң бо дүрүмнерин хажыткан таварылгада, торгаал хевирлиг административтиг кеземчелерни онаар: хуу кижилерге 10 муңдан 20 муң рубль чедир; албан-дужаалдыг кижилерге 30 муңдан 60 муң рубль чедир; а юридиктиг черлерге 400 муңдан 800 муң рубль чедир.
Хамаатыларның айыыл чок чоруун хандырып, бойдус курлавырларын камгалаар сорулга-биле өртке удур айыыл чок чоруктуң дүрүмнерин болгаш негелделерин сагыыры албан.