Тывада Россияның чоннар ассамблеязының регионалдыг салбыры, И.Г. Сафьянов аттыг орус культура төвү база республиканың Улусчу чогаадылга төвү Националдар херектериниң талазы-биле федералдыг агентилелдиң база Тыва Республиканың Чазааның деткимчези болгаш «Россияның чоннарының ассамблеязы» бүгү-российжи ниитилел-күрүне организациязының грантызы-биле «Чурттап чор мен, ынак мен, чоргаарланыр мен» деп өөредилге-чырыдыышкынныг форумну организастап эрттирген.
Форум бүдүүзүнде, Бии-Хем кожуунга Тыва күрүне тургузуунуң үндезилекчилериниң бирээзи Иннокентий Георгиевич Сафьяновтуң 150 харлаанынга, Туран хоорайның тургустунганындан бээр 140 чылдаанынга тураскааткан хемчеглер болуп эрткен. Программаның сүлде-сүзүк кезээнге Бурган чүдүлгези, Сафьяновтарның өг-бүлезинге мөргүл, Туран хоорайда князь Владимир хүрээзинге экскурсияны организастаан.
Туранда Баштайгы орус көжүп келгеннерниң парыгынга форумнуң байырлыг ажыдыышкыны болган. Эртенги шакта-ла эгелээн тус черниң өрегелер болгаш «Алдын күс» делгелгези хөйнү хаара туткан. Тускай шериг операциязынга киришкен авторлар аразынга шүлүк мөөрейи, Абакандан «Воскресение» деп орус улустуң ыры ансамбли оюн-тоглаазын көргүскен. Паркка келгеннер бот-тывынгыр ыры коллективтериниң чогаадыкчы мөөрейиниң күүселдезин көөр аргалыг болганнар.
Төөгүлүг сактыышкынның болгаш салгалдарның салгалдарының демдээ болур паркта, Сафьяновтар садының эге таваан салыры - форумнуң кол болуушкуну болган. Оон ыңай Туран хоорайга регионнар аразының II-ги Сафьянов номчулгалары болуп эрткен. Ооң киржикчилери Сафьяновтарның өг-бүлезиниң салым-чолун, регионнуң культуразынга болгаш чүдүлгезинге оларның киирген үлүг-хуузун улам ханы шинчилеп көөр арганы берген. «Бисти Сафьяновтар каттыштырган» деп турисчи маршруттуң таныштырылгазын база эрттирген.
Өөредилге-чырыдыышкын форуму ооң-биле доозулбаан. Ол октябрь 11-де ТАР-ниң ССРЭ-ге каттышканындан бээр 81 чыл оюнга тураскаадып "Бир шагда..." деп бот-тывынгыр театрлар фестивалы-биле уламчылаар. Ноябрь 1-де, Чоннуң чаңгыс деминиң хүнүнүң бүдүүзүнде, форумнуң чогаадыкчы чадазының тиилекчилериниң гала-концерти болгаш «Улуг этнографтыг диктант» Бүгү-россия чергелиг чырыдыышкын акциязы-биле доостур.
Сафьяновтарның өг-бүлези Тываның төөгүзүнге улуг исти арттырган. Георгий Павлович Сафьянов республикага Туран, Өөк суурларны үндезилеп, садыг-саарылга, мал ажыл-агыйын тудуп чораан. Иннокентий Георгиевичиниң ады кожууннуң төөгү дептеринде мөңгеде киир бижиттинген: ол чүгле революсчу эвес, а Буян-Бадыргы Монгуш-биле кады Тыва Арат Республиканы тургусчуп, тыва чоннуң культуразын, бот-тускайлаңын көргүзүп чораан суртаалчы кижи чораан. Белоцарск хоорайны Кызыл кылдыр эде адаарын база ол саналдаан. Тыва Республиканың орус культура төвү ооң адын эдилеп чоруур, ында чоннар аразының харылзаазын быжыглап, езу-чаңчылдарын камныг кадагалап, сайзырадып, делгелгелерни, лекцияларны, чогаадыкчы ужуражылгаларны эрттирип турар. Төптүң баарында Иннокентий Георгиевичини оратор болгаш чырыдыкчы кижи кылдыр көргүскен хүлерден шуткуп куткан тураскаал бар.