«Алдын-Булак» этнокультура комплекизинге чылдың-на эртип турар «Тываның командазы-2030» деп аныяктарның ээлчеглиг өөредилге форуму доозулган. Бо чылын ол онзагай болуушкун Тываның шупту кожууннарындан 100 ажыг аныяктарны — сайгарлыкчы ниитилелдиң, аныяктарның хөй-ниити организацияларының төлээлерин, волонтерларны, студентилерни чыгган. Сентябрьның 19-тан 21-ге чедир үш хонук дургузунда, форумнуң киржикчилери мастер-класстарны, тренингилерни, лекцияларны болгаш сайгарлыкчылар, эксперттер, хөй-ниити ажылдакчылары, чазак болгаш бизнес төлээлери-биле ужуражылгаларга киришкеннер.
«Тываның командазы-2030» дээрге төлевилел боттандырыышкынынга чүгле өөредилге шөлү эвес, а Тыва Республиканың Чазаандан грант деткимчезин алыр арга-дыр.
Форумнуң байырлыг ажыдыышкынында Тыва Республиканың Чазааның Даргазының оралакчызының хүлээлгезин күүседип турар Айдыс Сынаа Тываның Баштыңының өмүнээзинден чыылганнарга байырны чедирген. Өөредилге сайыдының хүлээлгезин күүседип турар Орлан Соян, Дээди Хуралдың (парламентиниң) депутаттары Начын Чамбалдоо биле Людмила Осмоловская, Тываның Аныяктар парламентизиниң даргазы Иргек Товарищай, “Юнармия”-ның удуртукчузу Айдың Шивидек олар база сөстү алганнар.
Анастасия Бородина (“Аныяк сайгарлыкчылар клуву” төлевилелдиң регионалдыг төлээзи, “StudHall”-тың үндезилекчизи), Наталья Гросс (“Созидание” кижи капиталын хөгжүдер төп автономнуг коммерцияга хамаарышпас организацияның директору, «Экономиканы чедингир дыл-биле» төлевилелдиң удуртукчузу), София Чумак (Красноярск крайның Аныяктар Чазааның дублерлар даргазы) болгаш Никита Рыдин (Сибирь федералдыг университединиң специализи, Красноярск крайның Аныяктар Чазааның чөвүлекчизиниң дузалакчызы) эксперттер кылдыр форумга киришкен.
Тываның Аныяктар херектериниң талазы-биле яамызының дыңнатканы-биле алырга, социал болгаш бизнес адырже угланган бежен ажыг төлевилелдер грант деткимчезинче кордап киришкен.
Форумну бир дугаар 2017 чылда эрттиргенин сагындыраал. Оон бээр 1500 хире киржикчи ниитизи-биле 17,5 млн ажыг рубль түңнүг саң-хөө дузазын алганнар.