Тыва өг-бүлениң езу-чаңчылдарының чугулазынга болгаш үш азы оон хөй ажы-төлдү кижизидер ада-иениң ролюнга тураскааткан байырлал Хөй ажы-төлдүг өг-бүлелер хүнүн бир дугаар демдеглеп эрттирген. Байырлал хүнүнде, Кызылдың Улусчу чогаадылга бажыңынга, байырлал программазы, консультациялар, өөредилге кичээлдери кирген хөй ажы-төлдүг өг-бүлелер шуулганы болуп эрткен.
Тываның Чазааның Даргазының оралакчызының хүлээлгезин күүседип турар Аяс Хунай-оол, Дээди Хуралдың кадык камгалал, чонну ажылга хаара тудар болгаш социал политика айтырыгларының талазы-биле комитет даргазының оралакчызы Ульяна Монгуш, Тывада уруглар камгалакчызы Саида Сенгии олар үлегерлиг өг-бүлелерге байырны чедиргеннер.
Күш-ажыл болгаш социал политика сайыдының бирги оралакчызы Сылдыс Ондар хөй ажы-төлдүг өг-бүлелерге күрүнеден деткимче хемчеглериниң дугайында илеткелди кылган. Ол ышкаш форумга регионнуң идепкейлиг аныяктарының төлээлери киришкен. Аңаа уруглар кижизидилгезиниң, ооң иштинде азырап алган ажы-төлдүң, быжыг өг-бүле харылзааларының боттуг үлегер-чижектерин республиканың аныяктарынга көргүзери чугула деп организакчылар санаан.
Ол хүн Тываның Баштыңы Владислав Ховалыг ажылчын сургакчылаашкынга чорза-даа, регионнуң хөй ажы-төлдүг өг-бүлелеринге байырын бодунуң блогу таварыштыр чедиргеш, хөй ажы-төлдүг өг-бүлелерниң күрүнеде ужур-дузаның дугайында сагындырган:
«Бистиң Президентивис Владимир Владимирович Путин хөй ажы-төлдүг өг-бүлелерниң езу-чаңчылын кадагалап арттырарының чугулазын чаңгыс эвес удаа онзалап демдеглээн - деп, Владислав Ховалыг бодунуң блогунда бижээн. - Өг-бүлелерниң амыдырал-чуртталгазының байдалын экижидеринче угланган демографтыг, экономиктиг, социал политикаларны сайзараңгайжыдар дээш ажылдарны уламчылаар бис. Тываның хөй ажы-төлдүг өг-бүлелеринге сеткилимниң ханызындан байыр чедирип тур мен! Өг-бүле бүрүзүнге чедиишкиннерни, оожургалды болгаш чечектелиишкинни күзедим. Силерниң бажыңнарыңарга ынакшыл, билчилге, өөрүшкү кезээде өндереп чорзун!"
Шуулганда Тыва Республикада үлегер-чижектиг өг-бүлелерге өөрүп четтиргенин илереткен. 12 ажы-төлдү азырап чоруур Олимпий Монгуш биле Ондар Айнаш Владимировнаның өг-бүлези эң улуг. Өг-бүле 2025 чылда Бүгү-российжи «Чылдың өг-бүлези» мөөрейге тиилээн, а Айнаш Владимировна өг-бүле институдун быжыглаарынга болгаш ажы-төлдү кижизидеринге улуг үлүг-хуузун кииргени дээш, Россияның Президентизи Владимир Путинниң чарлыы-биле 2024 чылда «Ие маадыр» атка төлептиг болган.
10 ажы-төлдү азырап чоруур Дамчаа Демир биле Монгуш Инна "Чылдың өг-бүлези" деп мөөрейге эрткен чылын тиилээннер. «Иениң алдарының 1-ги чадазы» база «Күш-ажылдың хоочуну» деп аттың эдилекчизи, 11 ажы-төлдүг Светлана Оюннуң өг-бүлезин, 1989 чылда-ла "Маадыр Ие" орден-биле шаңнаткан 11 ажы-төлдү божуп-өстүрген Мария Ондар; «Иениң медалы» шаңналдың 2-ги чадазының эдилекчилери Валентина Допаан биле Раиса Санчат база «Күш-ажылдың кижизи – ажыл-ишчи кижи!» деп мөөрейниң тиилекчизи Алдын Хомушку оларны база база шуулганга демдеглээн.
Бо чылдың июльда Тываның Баштыңы Владислав Ховалыг амгы байырлалдар даңзызын өскертип, хөй ажы-төлдүг өг-бүлелерни алдаржыдар тускай хүннү байырлалдар календарынче киирер дугайында хоойлу төлевилелинге атты салганын сагындыраал. Тывада хөй ажы-төлдүг өг-бүле хүнүн чылдың-на сентябрьның үшкү субботазында демдеглеп эрттирер. Тывада үш азы оон хөй ажы-төлдүг 18 муң өг-бүле бар. Амгы үеде республикада шупту 78 муң өг-бүлениң 52 муңу – назы четпээн ажы-төлдүг.