Тываның найысылалынга Бүгү-российжи чадаг чарыш хүнүнде «Нацияның крозу-2025» чиик атлетика маргылдаазы болуп эрткен. Бо хемчег чайгы спортчу сезонну албан езузу-биле хагган. Кадык амыдыралды нептередир, чадаг чарышка республиканың шыырак спортчуларын илередир, чонну күш-культура болгаш спортче доктаамал хаара тудар дээш «Нацияның крозу» маргылдаа чылдың-на эрттирип турарын организакчылар дыңнаткан.
Хемчегниң кол сорулгалары: узун хемчээлдиг кадыкшылга маңын деткиири, спортчу разрядтарны күүседири, чоннуң мага-бодунуң кадыын быжыглаары.
Маргылдаага 320 спортчу киришкен, оларны эр-кыс болгаш назы-хар аайы-биле беш аңгы бөлүкке чарган. 2016 чылга чедир төрүттүнген уруглар 1 километрни, элээди болгаш улуг кижилер - 4, кыстар – 6, аныяктар болгаш херээжен спортчулар - 8 база эр улус 12 километрлерни маңнаан.
Тыва Республиканың иштики херектер сайыды Юрий Завьялов база полиция начальнигиниң хүлээлгезин күүседип турар Дмитрий Мокрогузов 40-49 харга чедир спортчулар аразынга 12 километрге киришкенин онзалап демдеглезе чогуур. Тыва Республиканың Дээди Судунуң судьязы Хээлиг Түлүш 50 хардан өрү назылыглар аразынга күжүн шенээн. Иштики херектер сайыды бодунуң бөлүүнге ийи дугаарында келген, а Дмитрий Мокрогузов удуртукчузундан сес минута артып кааш, үшкү черни ээлээн.
- Чөөн-Хемчиктен Евгения Кара-Сал 9 хар чедир бичии уруглар аразынга эң эки үе – 4 минуты 6 секундада маңнап келген. Оолдар аразынга Кур-Чер суурдан Амыр-Санаа Шугдур-оол (үези - 4:06);
- 4 километр хемчээлге бодунуң бөлүүнге кымны мурнай Таңдыдан Найыр Кыр келген (14:42). Шагаан-Арыгдан Оюна Опай (18:41), Таңдыдан Экер Салчак (14:23), Тожудан Чайырлаш Монгуш (19:32), КПК-ден Илья Гераскин (13:58), Таңдыдан Ай-Кыс Отугбай (18:23), Чөөн-Хемчиктен Мерген Монгуш (14:10), Кызылдан Юлия Бочегурова (17:55), Эрес Болат-оол (15:03) база Сүт-Хөлден Салбак Ондар (18:14) тус-тузунда тиилээннер;
- 6 километр хемчээлге Кызылдан Церин Шаравии (31:05), УОР-дан Айда-Сай Седип-оол (33:49) база Тываның информастыг технологиялар техникумундан Елена Баурина (41:22) шаңналдыг черлерже кирген;
- 8 километр хемчээлге кымнарны-даа мурнай Айнура Шалган (Тuva running, 36:12) база Дангырак Калбак (КПК, 31:43) келген;
- 4 километр хемчээлге тулган дээн маңчылар аразынга Чойган-оол Лопсан (Кызылдың педагогика колледжизи, 13:35), Айдыс Тогаа (12:10), Кызылдан Айдысмаа Ооржак (16:58) база Таңдыдан Аселя Хомушку (17:03) тиилээн;
- 12 километр хемчээлге Чыргакыдан Айыр-Санаа Монгуш (41:10.10), Өвүрден Кузел Томур (48:05.26), Бай-Тайгадан Айдемир Салчак (48:11.00) база Кызылдан Экер Хертек (55:15.72) тиилекчи болганнар.
Маргылдааның тиилекчилерин болгаш шаңналдыг черлер алган спортчуларынга Россия Федерациязының Спорт яамызының кубоктарын, дипломнарын, медальдарын, тураскаалдыг белектерин тывыскан.
«Нациялар крозу» - Россияда эң улуг массалыг спортчу хемчег. Бо чылын чадаг чарышты Ада-чурттуң Улуг дайынынга Тиилелгениң 80 чылынга база Ада-чурт камгалакчызының чылынга тураскаадып эрттирген. Чурттуң шупту регионнарында болуп эрткен «Нациялар крозунга» школачылардан эгелээш, пенсионерлерге чедир 1,5 миллион чедир киржикчилерничыл санында хаара тудуп турар.