Барыын-Хемчик кожууннуң чүс чыл юбилейин демдеглээн байырлалдың программазында спортчу мөөрейлер, кожууннуң хүндүлүг чурттакчыларын шаңнаары, чогаадыкчы коллективтерниң оюн-көргүзүглери арбын болган. Тываның Баштыңы Владислав Ховалыг байырлалга киришкен. Ол кожууннуң хоочуннары болгаш хүндүлүг чурттакчылары, Тываның бирги Президентизи, Барыын-Хемчик кожууннуң чурттакчызы Шериг-оол Дизижикович Ооржак-биле ужурашкан.
«Кожуун республиканың онзагай черлериниң бирээзи деп санаттынар. Ооң төөгүзү бүгү Тываның хөгжүлдези-биле сырый харылзаалыг. Республиканың культурлуг, экономиктиг болгаш социал хөгжүлдезинге маңаа төрүттүнүп, өскен шылгараңгай кижилер үнелеп четпес үлүг-хуузун киирген» - деп, Тываның Баштыңы демдеглээн.
Тываның Баштыңы Владислав Ховалыг Кызыл-Мажалык суурнуң культура төвүнге эрткен байырлыг хуралда, кожууннуң чурттакчыларынга болгаш аалчыларынга онзагай юбилейи-биле байыр чедирип, күрүне шаңналдарын тывыскан.
Кызыл-Мажалыкта 1000 олуттуг чаа стадионну белекке бергени - кожууннуң 100 чылдаан юбилейнде онзагай болуушкун болган. Ону чоннуң дилээ езугаар республика чазааның деткимчези-биле тудуп үндүрген.
Оон ыңай Тываның Чазаа Барыын-Хемчик кожуунну хөгжүдеринче угланган хөй санныг төлевилелдерни идепкейлиг боттандырып турарын республика Баштыңы демдеглээн. Ол дээрге школалар болгаш культура объектилериниң септелгези, чаа эмнелгелер болгаш культура бажыңнары, чаа библиотекалар тудуу-дур.База ол ышкаш кожуунда болгаш бүдүн республикада мал ажыл-агыйын улам хөгжүдер дээш суггарылга системазын катап тудуп, кожа регионнар-биле быжыг харылзааны тудар кол транспорт судалы - Абаза-Ак-Довурак автоорукту септээр ажылдар эгелээн.