Сентябрь 19-тан 21-ге чедир Бай-Тайга кожууннуң Тээли суурга "Сарыг-Хаяның чажыды" деп чонар-даш уран чүүлүнүң фестивалы эгелээр. Бо чылын байырлал эң-не хоочун даш-чонукчузу, Тывада чонар-даш уран чүүлүнүң үндезилекчилериниң бирээзи Норбу Салчактың 125 харлаанынга тураскаадып эртер.
Тываның Дээди Хуралының (парламентизиниң) 2023 чылдың октябрьда доктаалы-биле тургускан Тывада чонар-дашчының хүнүнге тураскаадып, чонар-даш уран чүүлүнүң фестивалы болур.
Бөгүн регионнуң губернатору Владислав Ховалыг чонар-дашчыларга профессионал байырлалы-биле байырны чедирген. Чонар-даш уран чүүлү тыва культураның чарылбас кезээ апарып, тыва мастерлерниң ажылдары Россияның болгаш бүгү делегейниң ат-сураглыг музейлеринде делгеттингенин ол демдеглээн.
Сентябрьның 19-тан 21-ге чедир Бай-Тайга кожуунга болуп эртер "Сарыг-Хаяның чажыды" фестиваль чогаадыкчы ужуражылгаларның, делгелгелерниң болгаш мастер-класстарның шөлү апаар. Фестивальга чонар-дашчыларның боттарының киржилгезинче онза кичээнгейни углап, оларның чогаадыкчы ажылдары канчаар оюп-сиилбиттингенин көөр арга тургустунар. Бо чылын чонар-даш чазаарын сонуургап, тудуп чоруур школачылар мөөрейге бир дугаар киржир.
Бай-Тайга кожуун чагыргазы, «Тыва Республиканың чонар-даш мастерлериниң эвилели» деп регионалдыг хөй-ниити организациязы фестивальды организастап эрттирип турарлар.