Национал медицинаның оториноларингология шинчилел төвүнүң сурдолог эмчилер бригадазы Тывада ажылчын сургакчылаашкын-биле келген. Оларның сорулгазы – тускай шериг операциязының хоочуннарынга эмчи дузазын чедирери. Отоларингология талазы-биле ажылдыг регионалдыг эмнелге организацияларынга организас-методиктиг удуртулга салбырының начальниги Дмитрий Липсон бөлүктү удуртуп чоруур.
Төп Россия девискээринде регионнарның оториноларингология албаннарының байдалын үнелээринче база ТШО киржикчилеринге тускайлаттынган эмчи дузазын көргүзеринче угланган үнүүшкүннүг комплекстиг хемчеглерни эрттирип турар. Тыва – бо чылын специалистер командазының ажылдап турары он бир дугаар региону болур. Эмчилер скринингилиг шинчилге үезинде, ТШО киржикчилери болгаш хоочуннар аразындан кулаа дыңнавастаанындан инвалид болганын шынзыдар ужурлуг кижилерни база кезиишкинниг эмнээшкинче кордакчыларны шилип алырлар.
Тывада шериг албанныгларга моон-даа соңгаар бедик мергежилдиг тускайжыттынган эмчи дузазын көргүзер кылдыр Национал медицинаның оториноларингология шинчилел төвүнүң баазазынга республиканың специалистерин өөредир арганы эмчилер-биле чугаалашканын Тываның Баштыңы Владислав Ховалыг бодунуң блогунда дыңнаткан.
"Тускай шериг операциязының дыка хөй киржикчилери дайынчы операциялар үезинде кулак иштиниң кемдээшкиннерин алганындан, дыңнаары баксырай бээр айыылдар бар. Үе-шаанда шинчээш, кулактың дыңнаары шуут чиде бээрин болдурбазы-биле, чогуур эмнээшкинни азы реабилитацияны шилип алыр арганы аарыг кижиге бээр" - деп, регионнуң баштыңы демдеглээн.
Сентябрьның 16-да, бирги ажыл хүнүнде, эмчилер командазы тускай шериг операциязының 40 хире хоочуннарын шинчээн. Шупту 80 кижи хүлээп алыышкынче бижиткен. Сентябрь 17-де эмчилер ам-даа хүлээп турар.