Тываның Чазааның бажыңының мурнунда Россия Федерациязының болгаш Тыва Республиканың күрүне туктарын көдүрериниң байырлыг езулалынга шериг кезектериниң, чепсектиг күштерниң парад бөлүктери, Кызылдың президентиниң кадет училищезиниң кадеттери, аныяк армейжилер, Тываның университединиң шериг белеткел төвүнүң тук бөлүү, ол ышкаш күрүне болгаш чазак удуртукчуларының төлээлери киришкен.
Республиканың Баштыңы Владислав Ховалыг чаңчыл езугаар хемчегни ажыткан. Регионнуң баштыңы байырлалдың бо хүнүнде, күш-ажылы болгаш талантызы-биле республиканың хөгжүлдезинге үлүг-хуузун киирип чоруур кижи бүрүзүнге өөрүп четтиргенин илереткен. «Төрээн черивис дээш чоргаарал хүннүң-не долуп, чаа салгал бүрүзүнүң Тывага ынакшылы улам күштелип чорзун» - деп, ол демдеглээн.
Владислав Ховалыг республиканың төнчү чок дээрин, күчүлүг хемнерин, арыг-силиин, чаагай чоруун болгаш чечектелиишкинин илередип турар тыва туктуң ужур-утказын онзалап демдеглээн. «Өң бүрүзү ханы утканы илередип, өндүр улуг культураның кезии бис деп чүвени сагындырып турар» - деп, Баштың бодунуң блогунда бижээн.
Туктар көдүрер езулал соонда, республиканың Баштыңы Владислав Ховалыг Тыва Республика талазы-биле иштики херектер сайыды, полицияның генерал-майору Юрий Завьялов-биле кады чалыы хамаатыларга паспорттарны байырлыг байдалга тывыскан.
Найысылал школаларының өөреникчилери: Арам Кужугет, Нима Куулар, Кан-Демир Монгуш, Долаан Наважап, Карина Неволина, Тензин Ондар, Евгения Санаа, Тамир Саая, Кирилл Фасхутдинов, Анета Чыргал, Елизавета Гаришева, Антонина Солдатова, Илья Воротников ол кол документилерин байырлыг байдалга алганнар.