Тываның күрүне тугунуң хүнүн 2023 чылдан бээр демдеглеп эрттирип турар. 33 чыл бурунгаар, таптыг-ла ол хүнде, республиканың Дээди Соведи Тываның күрүне тугунуң амгы хевирин бадылаан.
“Тываның буянныг чүректери” аныяктарның хөй-ниити шимчээшкининиң республиканың күрүне тугунуң хүнүн тургузар дугайында эгелээшкинин Тываның Чазаа 2023 чылда деткээнин сагындыраал. Баштай ол хүннү февраль 8-те тургузарын саналдаан, оон республиканың хөй-ниити ажылдакчылары болгаш эртем-шинчилел болгаш өөредилге албан черлериниң төлээлери киришкен хөй-ниити сайгырылгазының үезинде, 1992 чылдың сентябрь 17-де республиканың Дээди Соведи тыва тукту бадылаанын демдеглээн. Хөй-ниитичилер ол хүннү ынчалдыр шилип алганнар.
Байырлалга уткуштур элээн каш хемчеглер планнаттынган:
Сентябрь 17-де:
9:00 ш. – Кызыл хоорайның Арат шөлүнде Россияның база Тываның күрүне туктарын байырлыы-биле көдүрер;
10:00 – авточарыш;
10:30 – Ыдыктыг Дөгээ даанга республиканың күрүнениң ыдык демдектерин көдүрер;
13:00 – А.С. Пушкин база К.И. Чуковский аттыг библиотекаларга, ол ышкаш караа көрбес болгаш дыңнавас кижилерниң тускай библиотекаларынга “Тыва Республиканың күрүне тугунуң хүнү” деп темалыг шактар.
Ол неделяда республиканың өөредилге албан черлеринге “Тыва Республиканың күрүне ыдыктары” деп темалыг класс шактары эртер. Республиканың муниципалдыг тургузугларының библиотека база клуб системаларының албан черлеринге темалыг шактар болгаш акциялар болур.
И.Г. Сафьянов аттыг Орус культура төвү школа назыны четпээн уругларга чурттуң болгаш республиканың күрүне туктары-биле тырттырган онлайн-флешмобну организастаар.
Сентябрьның 16-да, Кызылдың Аныяктар ордузунга, республиканың күрүне демдектериниң дугайында кинону болгаш тыва туктуң төөгүзүнүң дугайында лекцияны организастаар. Ол ышкаш Тываның тугунга тураскааткан роликти Кызылдың хөй-ниити экраннарынга база республиканың күрүне пабликтеринге дамчыдар.
Тываның Дээди Хуралының депутаттары ол хүнде школачылар база ТШО киржикчилери-биле парламент кичээлин эрттирер.
Сентябрьның 15-17 хүннеринде, Националдар херектериниң талазы-биле агентилел Тыва Республикада Сибирьниң биче буурай үндезин чоннарының ажы-төлүнге “Тываның тугу” деп чураан чуруктарга онлайн-акцияны эрттирер.
Аныяктар херектериниң талазы-биле яамы соңгаларга тыва тук чураан “Тываның соңгалары” деп акциязы бир неделя дургузунда эрттирер.