Тываның Баштыңы Владислав Ховалыг Сергей Күжүгетович Шойгу-биле Москвага ажыл албан үезинде ужурашкан. Бистиң алдарлыг чаңгыс чер чуртуувустуң төрээн республиказының хөгжүлдезинге сонуургалын база Тываның чурттакчыларның амыдырал-чуртталгазының шынарын бедидеринче угланган төлевилелдер боттаныышкынынга кады ажылдажылгага беленин регион баштыңы онзалап демдеглээн.
Владислав Ховалыг Сергей Шойгуга республиканың өөредилге болгаш чуртталга тудуунуң талазы-биле чедиишкиннерин дыңнаткан. Бо чылын алды чаа школа ажыттынган, ол-ла хире санныг школаларга капитал септелгени чоруткан. Оон аңгыда, чиигелделиг ипотека программазы-биле туткан бажыңнарның баштайгы ээлери үрде манааны дүлгүүрлерин алган. Регионнуң инфраструктуразы кел чыдар одалга сезонунга белеткелин аңгы чугаалашкан.
Тываның Баштыңы дайынчы хөделиишкиннер киржикчилеринге болгаш оларның өг-бүлелеринге республикада кандыг дуза көргүзүп турарын чугаалаан. Ужуражылга үезинде 55-ки аңгы гвардейжи мотоадыгжы бригаданың (дагжы) тургустунганындан бээр 10 чыл оюн демдеглээринче онза кичээнгейни угландырган.
«Сергей Күжүгетович бистиң дайынчыларывыска шаңнал-макталдарны тыпсырынга дузалажырынга беленин илеретти» - деп, Владислав Ховалыг чугаалаан. - Ноябрьда Шумов алышкыларның тураскаалын база «Победа» спортчу-культура төвүн байырлыы-биле ажыдар хемчеглерже киржип келир кылдыр төлээн Тывазынче чаладым».