Сентябрь 12-ден 14-ке чедир Тывада «Көшкүн чоннарның найыры» деп бирги делегей чергелиг «Го» фестивалы эртип турар. Го дээрге Бурунгу Кыдатка ийи муң ажыг чыл бурунгаар тывылган ширээ кырынга ойнаар эң-не бурунгу оюннарның бирээзи. Бо оюн-биле Тыва база төөгүлүг харылзаалыг деп организакчылар демдеглеп турар.
Көзенектей чарган самбырага боттарының өңнүг даштарын (кара азы ак) даштарын көжүп, ийи ойнакчы Гону ойнаар. Оюннуң сорулгазы – удурланыкчының хостуг черлерии эжелеп алыры.
Кыдат, Көрей, Моол, Казахстан, Кыргызстан, Узбекистан, ол ышкаш Алтай, Красноярск крайлар, Бурятия база Хакасиядан 50 хире киржикчилер маргылдаада келген. Бо чылдың март айда Тываның Баштыңы Владислав Ховалыг Россияның Го федерациязының президентизи Максим Волков-биле ужурашканын сагындыраал. Ужуражылга үезинде бо оюнну Тывага нептередирин чугаалашканнар.
"Россияның Го федерациязы-биле кады күжениишкиннерни салып, бурунгу ол ширээ оюнун катап диргизип эгелээнивиске өөрүп тур мен. Бо байырлал акы-дуңмалышкы чоннарны каттыштырган чаа чаңчылдың үндезини апаарынга бүзүрээр мен" - деп, Владислав Ховалыг бодунуң блогунда бижээн.
Тыва Республиканың Чазааның Даргазының оралакчызы Орлан Сарыглар, Россияның Го федерациязының президентизи Максим Волков, хүндүлүг аалчылар – ВЦИОМ-нуң чиңгине директору Валерий Федоров, Россияның Национал спорт болгаш олимпийжи эвес оюннарның спорт комитединиң президентизи Борис Гришин, Кызылда Моолдуң чиңгине консулу, дээрги Охиндоо Цэндсүрэн, Азияның Го федерациязының чиңгине секретары Хьюаньхээ Ким олар Виктор Көк-оол аттыг Национал театрга эрткен фестивальдың ажыдыышкынының киржикчилеринге байырны чедиргеннер.
СЕнтябрь 12-де театрга мөөрейниң баштайгы ийи туру эрткен. Үшкү болгаш дөрткү турлар сентябрь 13-те «Алдын-Булак» этнокультура комплекизинге, а түңнел оюннар сентябрь 14-те «Сүбедей» универсалдыг спорт комплекизинге болуп эртер. Тиилекчилерни ол-ла хүнде шаңнаар.
Сентябрь 13 биле 14 хүннеринде Кызылдың Арат шөлүнге Го оюнунга ажык мастер-класстарны организастаар. Михаил Подоляк баштаан Россияның Го федерациязының инструкторлар командазы ону эрттирер. Республиканың чурттакчылары оюннуң эге чадаларын шиңгээдип, мини-турнирлерге киржип болур.