Тыва Республиканың Прокуратуразының дайынчыларывысче дамчытканы үш “Патриот” УАЗ автомашиналар Тываның найысылалындан тускай шериг операциязының зоназынче сентябрь 11-де аъттаныпкан. Республика Чазааның база регионалдыг Дээди Хуралдың (парламент) деткимчези-биле машиналарның техниктиг байдалын хынап, баш бурунгаар белеткээн.
ТР-ниң Дээди Хуралының депутады Роберт Доржу автомашиналар артык дугуйлары, аккумляторлары болгаш үстери-биле хандырган. Мөңгүн-Тайга кожууннуң Ада-чурт дайынчыларының өг-бүлелер комитединиң волонтерлары гуманитарлыг ачы-дузаламчыны: тепловизорлардан камгаланыр четкилери болгаш чоорганнарны дамчыткан. Регионалдыг Авиаарга-арыг камгалалы генераторлар, бензохирээлер болгаш канистрлерни чүдүрген.
Сентябрь 3-те республикада күскү гуманитарлыг ачы-дуза чыылдазы эгелээнин сагындыраал. Тываның Чазааның деткимчези-биле Бүгү-российжи Улусчу фронтунуң регионалдыг күүсекчи комитеди кампанияны организастаан.
Республиканың чурттакчылары дайынчыларга чугула херек чүүлдерни чыылда пунктуларынче дужаап турар. «Чүък чүдүрер автомобильдер» 2 дугаар акционерлиг ниитилел ачы-буян кампаниязын деткип, бензогенераторну мурнуку шугумче чоруткан.
Бо организация ТШО киржикчилериниң чагыы-биле чугула хереглелдиг дериг-херекселдер, кывар-чаар материалдар-биле доктаамал дузалажып турарын демдеглезе чогуур.
Улусчу фронтунуң Аныяктар активчилери чыгган акшазы-биле бензин-биле ажылдаар хирээни садып берген.
Кызыл хоорайның солгай талакы дачаларда волонтерлар отряды снайперлер шыптынар шывыгларны дамчыткан. Чоокта чаа ажылдап эгелээн отряд дөрт «панцирьни» белеткеп четтигипкен. Бүгү республиканың волонтёрлары үе-үе болгаш-ла мурнуку шугумче чорудар тускай хереглелдерни кылып турар. Дыка херек үеде ажыглаар хан доктаадыр хендирлерни Кызылда белеткеп турар болза, Мөңгүн-Тайгада күскү үеге өңнеш чаштынар четкилерни өрүп эгелээн. Херээжен чон дайынчыларга чылыг болгаш эптиг чеңи-чоктар болгаш курлар даараарынче кирген.
Гуманитарлыг ачы-дузаның күскү чыылдазы ам-даа уламчылаар. Бодунуң үлүүн киириксээн кижи бүрүзү дараазында адресте чыылда пунктузунга кээп болур: Кызыл хоорай, Эки турачылар кудумчузу, 3 азы ТывКУ-нуң штавы (Ленин кудумчузу, 5). Харылзажыр телефону: 8 (39422) 2-10-50. Генераторлар, рациялар, дроннар, РЭБ дериг-херекселдери база волонтерларның кылган чүүлдери мурнуку шугумда дайынчыларывыска дыка херек.
Октябрь 22-де чыылда доостур. Чыгдынган ачы-буян чүъгү ийи аңгы угланыышкынче углаптар: Курск облазынче база чаа регионнарже. Тыва Республиканың Чазаа ачы-буян чүгү чүдүрген чүък машиналарынга кывар-чаар материалдарны чаңчыл езугаар хандырар.