Тываның өөреникчилери Россия Федерациязының Президентизиниң кубогу дээш улуг маргылдааларның түңнел чадазынга тиилелге дээш киржирлер. Баштайгылар шимчээшкининиң «ЮНАРМИЯ» база «ВОИН» төвү-биле кады боттандырып турары кол төлевилелдери «Президент маргылдаалары», «Президент спортчу оюннары», «Зарница 2.0» деп шериг-патриотчу оюннарның регионалдыг маргылдааларының тиилекчилери бистиң республиканы төлээлээрлер.
Бо хонуктарда Кызыл-Мажалык ортумак школазының командазы «Смена» бүгү-российжи уруглар төвүнде чеде берген. «Президентиниң спортчу оюннары-2025»-ке барыын-хемчикчилер тиилелге дээш туржур. «Президент маргылдаалары-2025»-тиң чайгы спорт хевирлеринге киржир дээш Чадаана хоорайның 1 дугаар школазы биле Ийи-Тал суурнуң аграрлыг школа-интернадындан чыгдынган команда «Орленок» бүгү-российжи уруглар төвүнче аъттаныпкан.
Тываның кадет корпузунуң командазы сентябрь 15-23 хүннеринде Маадыр-хоорай Волгоградта - «Авангард» камгалал-спортчу лагерьниң баазазынга база инженер шериглериниң полигонунга шыңгыы шылгалдаларга киржир. Улуг кадеттер шын дайынчы негелделерни тургускан конкурстарга: шеригжи аңгы-аңгы тускай эртемнерге мергежилин, гарнизон албанының арга-мергежилин билирин көргүзүп, улуг хемчээлдиг шериг-тактиктиг оюннарга киржир. Кадеттер командирлер, штурманнар, политиктиг удуртукчулар, журналистер, сапёрлар, эмчи ажылдакчылары, БПЛА операторлары кылдыр боттарын көргүзер.
Росгвардияның, ОБЯ специалистери, тускай шериг операциязының хоочуннары, Тываның Өөредилге яамызының немелде өөредилге сайзырадыр төвүнүң баазазында «Авангард» өөредилге-методиктиг төптүң башкылары келир үениң камгалакчыларын белеткээн.
Оолдар, уруглар маргылдаалардан аңгыда, Ада-чурттуң Улуг дайынынга Тиилелгениң 80 чылынга тураскааткан культура-кижизидилгелиг улуг программага киржирлер.
“Аныяктар болгаш уруглар” национал төлевилелдиң “Шупту эки чүүлдерни уругларга” федералдыг төлевилел күүселдези-биле школачыларның «Президент маргылдаалары» база «Президент спортчу оюннары» бүгү-российжи спортчу маргылдаалары эртип турарын сагындыраал. Төлевилелдиң эгелээшкиннер даңзызында школаларның капитал септелгези, школалар тудуу болгаш амгы үениң дериг-херекселдери-биле чепсеглээри, бүгү-российжи болгаш делегей чергелиг олимпиадаларны эрттирери, талантылыг уругларны өөредири болгаш үдээри, бүгү-российжи спортчу маргылдаалар кирип турар.