2025 чылдың бирги чартыында Тываның чурттакчыларының өнчү-хөреңги үндүрүглеринге өрези 68,8 млн. рубльге кызырылган. Үндүрүг албанының дыңнатканы-биле алырга, чыл эгезинде ол үндүрүглерге ниити өре 184,3 млн. рубль турган. Август 1-ге чедир ол 115,5 млн чедир, азы 63 хуу эвээжээн.
Транспорт үндүрүглеринге өре ийи катап кызырлып – 105,7 млн. рубльден 59,7 млн. рубльде келген. Өнчү-хөреңги үндүрүүнге 22,8 млн. рубль өрезиниң 13,3 млн-и августка чедир төлеттинмейн арткан. Чер үндүрүглеринге өре төлевири эң куду деңнелде – январьдан июльга чедир ол дөрттүң бир кезии хиреге, азы 55,8-тен 42,6 млн. рубль чедир эвээжээн.
Тываның Чазаа үндүрүг ажылдакчылары үндүрүглерде өрелерни суд шиитпири чокка төлээринче хамаатыларны кыйгырып, тайылбыр ажылдарын чорудуп турар. Бо чылын үндүрүг өрелерин чыырының бирги шалыпчы айы июньда эрткен. Ооң түңнелдери-биле алырга, специалистер-биле өрелиг кижилерниң аразында амы-хууда ужуражылгалар болгаш чугаалар судче баарындан хөйнү чедип алыр болганын көргүскен.
Өнчү-хөреңги үндүрүглеринге ниити өре элээн эвээжээн-даа болза, ол ам-даа хөй, ынчангаш республиканың эрге-чагыргазы шалыпчы айны катап чорудар деп шиитпирлээн. Ол сентябрь 15-тен октябрь 15-ке чедир болур. Муниципалдыг чагыргалар болгаш үндүрүг албанының ажылдакчыларындан тургустунган ажылчын бөлүктер өрелиг кижилерниң чаарттынган даңзызын тургузуп, олар-биле ужуражырынга белен.
2025 чылдың ноябрь 1-ден хууда сайгарлыкчы эвес хамаатылардан үндүрүг өрезин судтаашкын чокка чыып эгелээрин үндүрүг албаны дыңнаткан. Үндүрүг хоойлузунда чогуур өскертиишкиннерни киирген. Үндүрүг төлекчизинге үндүрүг өрезин тырттар дугайында шиитпирни Россияның Федералдыг үндүрүг албанының «Хууда кабинет» сервизи азы Күрүне ачы-дузаларының порталы таварыштыр, а бир эвес ол болдунмас болза, тускай чагаа-биле дыңнадып чорудар.
Бир эвес хамааты кижи өрениң түңү-биле чөпшээрешпес болза, 30 хонук дургузунда удурланган бижикти киирер эргелиг. Ону сайгарып турар үеде, маргыштыг түңнү тыртпас. Бир эвес маргыш түңнел бербес болза, ону суд чорудуу-биле шиитпирлээр. Чаартынган чурум-биле судтуң күрүне каайлызын, хөөлерин болгаш күүселде чыылдазын төлеттирбейн, өрелиг кижилерниң саң-хөө чүъгүн эвээжедир арганы бээр.