Сентябрь 11-де Россияда Элээр чорук хүнүн демдеглеп турар. Бо хүнде араганың хоразын чонга суртаалдаар сорулгалыг хемчеглер бүгү чуртта эртип турар. Элээр чоруктуң хүнүн российжи деңнелде сентябрь 11-де, а делегей деңнелинде октябрь 3-ке демдеглеп турар.
Тыва Республиканың Кадык камгалал яамызының дыңнатканы болза, регионда бүгү-россияның болгаш бүгү-делегейниң элээр чорук хүнүнге тураскааткан шалыпчы ай бо чылдың сентябрь 6-дан октябрь 4-ке чедир уламчылаар. Республиканың аңгы-аңгы организацияларынга болгаш албан черлеринге ажылчыннарга өөредиглиг лекцияларны, профилактиктиг консультацияларны организастаар. Регионнуң өөредилге организацияларынга хоралыг чаңчылдардан ойталап билиринге өөредир «ЧОК деп чугаалап билир бол» деп аттыг интерактивтиг квест оюннарны эрттирер.
Бөгүн Кызылдың Арбат шөлүнге, амыдыралдың кадык овур-хевирин нептередиринче болгаш арагага хөңнү чок чорукту суртаалдаарынче угланган темалыг хемчеглер эрткен. Хемчеглер программазында «Элээр чорук – амыдыралдың нормазы», «Арага ижер хоралыг чаңчылга удур хөделиишкин» база «Бис болгаш бистиң келир үевис» деп аттыг акциялар чоннуң кадыкшылын быжыглаар болгаш арагага удур хамаарылгазын хевирлээр өске-даа эгелээшкиннер кирген.
Республикада хоойлуга удур арага продукциязын садып-саарарынга хамаарыштыр доктаамал ажылды организастаан. ТР-ниң ИХЯ-зы-биле кады Тыва Республиканың ажыл-чорудулганың чамдык хевирлеринге чөпшээрел болгаш хайгаарал албаны республика чурттакчыларындан келген билдириишкиннерге даянгаш, неделя санында рейдилерже үнүп турар. 2025 чылдың 8 айларында арага продукциязын садып-саарар адырда 200 ажыг чурум үрээшкиннерин илереткен, хоойлуга удур садыг-саарылгадан 26 муң ажыг литр эзиртир суксуннарны хавырган. Чижээ, чоокта чаа “Шивилиг” стационар постузунга рейд үезинде, чогуур документилери чок 11 муң ажыг тонна арага продукциязын сөөртүп чораан “МАЗ” автомашинаны доктаадып, туткан.
Тываның Чазаанга бо чылдың июльда, регион Баштыңының удуртулгазы-биле, хоойлуга удур арага садар болгаш чурттакчы чоннуң арагалаашкынынга удур демиселди чугаалашкан хурал болуп эрткен. Территориалдыг хыналда-хайгаарал, корум-чурум камгалаар органнар, регионалдыг яамылар болгаш ведомстволар удуртукчулары база хөй-ниити болгаш шажын чүдүлге төлээлери аңаа киришкен. Владислав Ховалыг хурал төнчүзүнде, республикада кижиге удур аар болгаш онза аар кем-херектерниң үнер кол дөзү болур арага ижерин эвээжедириниң дугайында Концепцияны ажылдап кылыр даалганы берген.