Камчаткага чер шимчээшкининиң үезинде, онкологтар бригадазының составынга кезиишкин чорудуп турган тыва эмчи Менги Дадар-оол Пирогов ордениниң эдилекчизи болган. Айыылдыг байдалдарда эмчи дузазын көргүзеринге бедик профессионал болгаш коргуш чок чоруу дээш бедик күрүне шаңналынга төлептиг болган Тывада ийи дугаар эмчи ол.
Менги Сылдысович Дадар-оол – салым-чаяанныг аныяк специалист. Профессор В.Ф. Войно-Ясенецкий аттыг Красноярскиниң медицина университедин 2019 чылда, Сибирьниң күрүнениң медицина университедин 2021 чылда дооскан. «Эмнээшкин херээ», «Хөрек хирургиязы» деп мергежилдерни чедип алган. 2020 чылда республиканың 1 дугаар эмнелгезиниң 4 дугаар пульмонология салбырынга эмчи брады болуп күш-ажылчы базымнарын эгелээн. Ооң соонда дөрт чыл хиреде республиканың онкология диспансериниң өкпе болгаш ижин-шөйүндү ыжыктарының салбырынга өкпе хирургу болуп ажылдаан. 2024 чылда Тыва Республиканың Кадык камгалал яамызының Хүндүлел бижии-биле шаңнаткан.
Менги Дадар-оол национал төлевилел шугуму-биле Тываның эмнелге албан черлеринге келген амгы үениң бедик технологиялыг дериг-херекселдерин ажыглаарын эмнелге практиказынче чедиишкинниг киирип, коллегалары-биле кады хирургияның улуг чара кезиишкин кылбас чаа хевирлерин шиңгээткен. Меңги Сылдысовичиниң аарыг кижилери эмчизиниң дугайында чүгле чылыг сөстерни чугаалаарлар.
Тываның Кадык камгалал яамызының электроннуг почтазынче аарыг кижилерден келген чагааларның бирээзинден үзүндүнү номчуулуңар: «Аарыг кижизи дээш сагыш човап чоруур мындыг ховар эмчиге таварышканымга дыка өөрүп чор мен. Аарыг кижиниң сегиири бодунуң эмчизинге бүзүрелинден дыка хамааржыр. Менги Сылдысовичиге ужуражып кээримге чедир, дыка коргар турдум. Келир кезиишкинниң шупту чадаларын, планнаттынган эмнээшкинни, катап сегип, тургустунарының үелерин бүзүрелдиг тайылбырлаан эмчимниң топтуг үнү мээң шупту коргуушкуннарымны чайладыпкан. Менги Сылдысович аныяк-даа болза, дыка шыырак эмчи. Хөй санныг аарыг кижилер болгаш эмчи эштерим ооң дугайында чүгле экини чугаалап чоруурлар. Шак ындыг салым-чаяанныг эмчилер чүгле санныг болур. Ындыг эмчиге таваржыры, аас-кежик-тир».
Менги Дадар-оол амгы үеде Камчатка крайның онкология диспансеринде ажылдап чоруур. Июль 30-де, ол регионга 1952 чылдан бээр болуп көрбээн улуг, 8 баллдан өрү күштүг чер шимчээшкини болган. Онколог эмчилер кезиишкин кылып турар үеде, силгиишкин эгелээн, ынчалза-даа олар ажылын ара кагбайн, дидим чоруун көргүскен.
Россияның Президентизи Владимир Путин кезиишкин үезинде, нарын берге байдалдарда эрес-дидим чоруун көргүскени дээш, диспансерниң дөрт эмчизин Пирогов орденнери-биле шаңнаан, оларның аразында Тываның чурттакчызы Меңги Дадар-оол база бар. Оон аңгыда Яна Гвоздева, Артем Еременко база Антон Калинин шаңналдарга төлептиг болганнар.
2020 чылда Россияга коронавирус пандемиязы нептерээн үеде, Пирогов орденин доктааткан. Амы-тынга айыылдыг байдалдарда эмчи дузазын көргүзеринге бодун хайырлавааны дээш, ол ышкаш практиктиг медицинада чедиишкиннери база онза айыылдыг халдавырлыг база халдавырлыг эвес аарыгларны тодарадырынга, болдурбазынга болгаш эмнээринге бедик үре-түңнелдиг ажылы дээш, эмчи ажылдакчыларынга болгаш волонтерларга ону тыпсып турар.
Республиканың 1 дугаар эмнелгезиниң хирург-травматолог эмчизи Эргил Чадамба Пирогов ордениниң Тывада бирги кавалери ол. 2022 чылдың июньда Россияның Президентизи ону шаңнаар дугайында шиитпирни үндүрген. Эргил Чадамба 2021 чылдың декабрьда “Тывадаг-дүгү” комбинаттың буступ-дүшкен оран-савазының адаанга кезиишкинни кылып, аңаа ажылдап турган кижиниң амы-тынын алганын сагындыраал.