Тывада чылдың-на август айда эгелээр «Школаже белеткениринге дузалаш» деп ачы-буян акциязы уламчылап турар. Ол хөй ажы-төлдүг өг-бүлелерни болгаш амыдыралдың берге байдалынга таварышкан өг-бүлелерни деткииринче угланган. Чаа өөредилге чылының бүдүүзүнде, ол акцияга бүдүн республикада аңгы-аңгы албан черлериниң киржири чаагай чаңчыл апарган.
Республиканың Күш-ажыл болгаш социал политика яамызының кезектеринге ажылдар август 7-де эгелээн. Кожууннарда болгаш Ак-Довурак биле Кызыл хоорайларында өг-бүлеге болгаш уругларга социал дуза чедирер төптер деткимчеге дыка хереглелдиг социал айыылдыг байдалда азы амыдыралдың берге байдалынга таварышкан школа назылыг ажы-төлдүг өг-бүлелерниң санын шинчилеп үндүрген. Бо хүнге чедир 165 өөреникчиге спонсор дузазын көргүскен. Чединмес өг-бүлелерге өөредилге херекселдерин, канцеляр барааннарын, идик-хепти хүлээп алыр ачы-дуза чыыр пунктуларны төптерде ажыткан. Бо пунктулар сентябрь 30-ге чедир ажылдаар. Республиканың курлавыр хандырылгазынга мониторинг болгаш анализ төвүнде чыылда пунктузу база ажылдап турар: Кызыл, Калинин кудумчузу, 1Б, кабинет 131, телефон 8 (39422) 2-17-19.
Республиканың курлавыр хандырылгазынга мониторинг болгаш анализ төвүнүң, «Идегел» автошколазының ажылдакчылары, сайгарлыкчылар Чимит Ооржак биле Оюу Куулар, ол ышкаш Сергей биле Алдын Севекпиттерниң хөй ажы-төлдүг өг-бүлези акцияга идепкейлиг киришкенин Күш-ажыл яамызы дыңнаткан. Өг-бүлеге болгаш уругларга деткимче төвүнүң 33 өг-бүлезинге болгаш школачыларынга, ол ышкаш Кызыл-Арыг школа-интернадының өөреникчилеринге адрестиг дузаны көргүскен.
Өөредилге яамызының албан черлеринде ачы-дуза чыыр пунктулар сентябрьның баштайгы он хонуунда база ажылдап эгелээн. Школага беленин тодарадыр кампанияның бир кезээ кылдыр, специалистер бажыңнарны кезип, дуза херек 670 ажыг уругларны, ооң иштинде чок апарган ТШО киржикчилериниң өг-бүлелерин тодараткан. Кызыл, Бай-Тайга, Өвүр, Кызыл, Мөңгүн-Тайга, Сүт-Хөл, Таңды, Тере-Хөл, Бии-Хем, Эрзин, Улуг-Хем, Тожу болгаш Чеди-Хөл кожууннарда кампания үре-түңнелдиг чоруп турарын Өөредилге яамызы демдеглээн.
Ылаңгыя Кызылда «Школаже белеткениринге дузалаш» база «Школаже уругну белеткеш» деп ачы-буян акциялары-биле өөредилге херекселдерин хүлээр 18 кабинет август 7-ден ажылдап турар. Хоорай мэриязының Өөредилге департаментизиниң дыңнатканы болза, сентябрьның 5-ке чедир хоорай школаларының хөй ажы-төлдүг болгаш эвээш орулгалыг өг-бүлелериниң өөреникчилеринге 648 муң ажыг рубль түңнүг ачы-дузаны көргүскен. Хоорайның болгаш республиканың чээрби ажыг организациялары, бүдүрүлгелери база энерел-сеткилдиг хамаатылары акцияга үлүүн киирген.
Регионалдыг Кадык камгалал яамызы, Арга-арыг яамызы, ол ышкаш “Сайзырал” дыштанылга баазазы база Республиканың профессионал өөредилге төвү өөредилге херекселдерин болгаш канцелярия барааннарын белекке берип, уругларның школаже белеткениринге улуг үлүүн кииргеннер. Өөредилге яамызының дыңнатканы-биле алырга, оларның берген дузаламчызын Тываның кадет корпузунче болгаш дыңнаары кошкак уругларның школа-интернадынче дамчыдар.
Бо чылын Аныяктар херектериниң яамызы Баштайгыларның шимчээшкини, Юнармия, “Тываның энерелдиг чүректери” болгаш “Тиилелгениң волонтерлары” дээн ышкаш регионалдыг аныяктар каттыжыышкыннары-биле каттышкан. Оларга Улусчу фронтунуң аныяктары болгаш хөй-ниити ажылдакчылары катчып келген. Ийи неделя дургузунда олар 15 школачыларны чаа өөредилге чылынга белеткеп, херек бүгү херекселдерниң долу комплектизи-биле хандырган. Улуг-Хем кожууннуң Хайыракандан база Шагаан-Арыгдан 10 өг-бүле база Кызылдан беш школачы дузаламчыны алган.
Акцияга киржилге ооң бодунга болгаш коллегаларынга онза өөрүшкүнү эккеп турарын аныяктар сайыды Субудай Оюн демдеглээн. "Хөй ажы-төлдүг бистиң өг-бүлевиске уругларын школаже белеткээринге бергедээшкиннер турган 90 чылдарның төнчүзү 2000 чылдарның нарын үелерин сактып келдим. Бичиизи болгаш, улуг акыларымның эргиндизин кедер турдум. А чамдыкта, чаа сумканы чугаалаваска, эш-өөрүм ышкаш, чаа ручка, карандаштар, ийи талалыг балааштыг болуксап чораан мен" - деп, сайыт бодунуң албан езузунуң арынында сактыышкыннары-биле үлешкен.