Тыва Республиканың Спорт яамызы бо чоокку үеде «Эзирлер уязы» деп аттыг биче хемчээлдиг спортчу залдарны тудуп эгелээринге сес суур: Бай-Даг (Эрзин кожуун), Самагалтай (Тес-Хем), Аянгаты (Барыын-Хемчик), Кызыл-Тайга (Сүт-Хөл), Ак-Тал (Чеди-Хөл), Чыраа-Бажы (Чөөн-Хемчик), Кызыл-Даг (Бай-Тайга) база Сарыг-Сеп (Каа-Хем кожуун) чагыргалары-биле дугуржулгаларны чарган. Бо чыл төнчүзүнге чедир шупту объектилерни туткаш, ажыглалче киирер.
Тываның Баштыңы Владислав Ховалыг бодунуң блогунда, төлевилел боттаныышкыны республиканың көдээ черлерин, бирги ээлчегде хүреш белеткелинче угланган спортчу залдар-биле хандырар арганы берип турарын, мооң мурнунда дыңнаткан. Кол инвесторларның бирээзи – «Эльбрусметалл-литий» компанияның деткимчези-биле бо 8 залды тудар.
“Регионда социал инфраструктураны тударынга бо бирги база сөөлгү эвес кады кылыр төлевилеливис болур” – деп, Тываның Баштыңы бо тудуг кады ажылдажылга программазының уламчызы-дыр деп айыткан.
Школачыларны болгаш аныяктарны шимченгир спортче, ооң иштинде республикада нептереңгей спорттуң эң билдингир хевирлериниң бирээзи хүрешче хаара тудары – ооң сорулгазы. Тывага төлевилел боттандырылгазы-биле шупту 39 спортчу бичии залдарны туткан. Төлевилел негелдези езугаар тудугну чоннуң киржилгезин ажыглап тудар, а республиканың Спорт яамызы тудуг материалдарын хандырар болза, арткан чарыгдалдарны муниципалитет бодунга хүлээнир. Эрткен чылдар дургузунда «Эзирлер уязы» спорт залдарын тударынга ниитизи-биле 90 ажыг млн. рубль акшаландырыышкынны үндүрген.
Ийи кезектен тургустунган: спортчу улуг залдыг болгаш солуттунуп кеттинер база тренерлерге өрээлдерлиг, сес-булуңчук хевирлиг спортчу объектини ыяштан тудар. Улуг залга спорттуң аңгы-аңгы хевирлеринге белеткелди эрттирер.