Сентябрь 8-те, шүлүкчү Расул Гамзатовтуң төрүттүнген хүнүнде, Россияда чурттуң чоннарының дылдар хүнүн бир дугаар демдеглеп турар. Бо онзагай хүннү Президент Владимир Путин бо чылдың июньда Дыл политиказының чөвүлелиниң хуралынга саналдаан.
«Россияның чоннарының дылдар хүнүн тургузуп, ону чылдың-на сентябрь 8-те, Расул Гамзатовтуң төрүттүнген хүнүнде демдеглеп эрттирерин саналдап тур мен. Ол алдарлыг «Дуруяалар» деп номнуң автору авар болгаш орус – ийи дылды төрээн дылдары деп санап чораан. Орус дылдың ачызында ооң чогаалдары делегей чергелиг деңнелче алдаржаан» - деп, Владимир Путин чугаалаан.
Тываның Баштыңы Владислав Ховалыг шылгараңгай шүлүкчүнүң ады бүгү делегейде миллион-миллион кижилерге билдингир дээрзин онзалап демдеглээн. Көдээ суурнуң болгаш өртемчейниң шүлүкчүзү – ону кезээде ынчаар адап чораан болгаш ам-даа адап чоруурлар.
Россияда езу-чаңчылдарны кадагалап арттырары, национал бот-тускайлаң чорукту болгаш дылдарның база культураларның хөй янзызын быжыглаары – байырлалдың кол сорулгазы. Дылдар дээрге өгбелерниң мерген угаанын шыгжап алган эң-не бай өнчү болур. Олар тоолдарны, ырыларны болгаш чаңчылдарны дамчыдып, чон бүрүзүнге онзагай культурлуг ылгавырны тургузуп турар.
«Россияның Чырыдыышкын яамызының дыңнатканы болза, 2025 чылда бистиң чуртта 270 ажыг төрээн дылдар болгаш диалектилер бар. Оларның аразында Тыва Республикада орус дыл-биле чергелештир күрүне дылы болуп турар төрээн тыва дылывыс бар» - деп, регионнуң баштыңы демдеглээн.