Тываның Баштыңы республиканың оруктарында дүвүренчиг байдалды айтып, оруктуң айыыл чок чоруун хандырарынче харыысалгалыг бүгү черлерни кыйгырган бижикти үндүрген.
Владислав Ховалыг ИХЯ-ның Тыва Республика талазы-биле Орук шимчээшкининиң айыыл чок чоруунуң күрүне инспекциязының хүн бүрүнүң сан-чурагайларынче кичээнгейни угландырып, ниити ажыглал оруктарынга эзирик 6-8 чолаачыны полиция хүннүң-не тудуп турарын айыткан. Чаа өөредилге чылының эгезинде ындыг статистика дүвүрелди болдуруп турарын демдеглээн:
“Тываның хоорай-суурларының кудумчуларында эртенги-кежээки шактарда школазынче барган, чанган уруглар көвүдээн. Олар эш-өөрү-биле хөөрешкеш, орукка кичээнгейин чидирип алыр таварылгалар бо-ла тургулаар. Бо таварылгада бистиң хүлээлгевис – оларның айыыл чок чоруун хандырары болур. Чолаачы кижиниң харыысалгазындан уругларның амы-тыны болгаш кадыкшылы хамааржыр” – деп, ол айыткан.
Тываның Баштыңы чолаачыларны харыысалгалыг болуп, орук шимчээшкининиң өске киржикчилериниң амы-тыны болгаш кадыы олардан хамааржыр дээрзин кезээде бодап, дүрүмнерни хажыт чок сагып, дүрген чоруурун шеглеп, орукче кел чоруур азы «Уруглар» деп демдектер чанынга турар уругларже онза кичээнгейни салырын кыйгырган.
“Бистиң кады күжениишкиннеривис Тывада уругларның эртем-билигже оруун айыыл чок болдурар ужурлуг” - деп, ол түңнээн.