Тываның Баштыңы Владислав Ховалыг республикада эң хоочун парлалга үндүрүлгези – «Шын» солуннуң 100 чыл оюнга тураскааткан байырлыг хуралга киришкен. Ооң-биле кады Тываның аңгы-аңгы үелеринде ажылдап чораан көскү күрүне болгаш хөй-ниити ажылдакчылары, журналистиканың хоочуннары, сураглыг артистер болгаш чогаадыкчы бөлүктер солуннуң ажылдакчыларынга байырны чедиргеннер.
Владислав Ховалыг ол үелерде солун Тывага чүгле массалыг информация, агитация болгаш пропаганданың чепсээ эвес турганын, «Шынның» журналистеринге байыр чедириишкининде демдеглээн. Ол тыва бижиктиң болгаш чогаалдың тургустунарынга болгаш сайзыраарынга, чоннуң культурлуг бот-тускайлаңын хевирлээринге, төрээн дылын кадагалап арттырарынга улуг рольду ойнаан. Республика Баштыңы солуннуң номчукчуларының аразында салгалдарның уламчылаарын база бүгү Тываның культуразында ооң ужур-дузазын онзалап демдеглээн:
«Бистиң ада-иелривистиң номчуп чораан солунун бистер база ажы-төлүвүс номчуп чоруур. Солун төрээн дылывысты, культуравысты болгаш ужур-чаңчылдарывысты кадаглап арттырарынга болгаш хөгжүдүп сайзырадырынга улуг ужур-дузалыг» - деп, ол чугаалаан.
«Шын» солунга Тываның дыка хөй алдар аттыг кижилери ажылдап чораан. Виктор Көк-оол, Степан Сарыг-оол, Бай-Кара Хөвенмей, Салим Сурун-оол, Кызыл-Эник Кудажы, Юрий Кюнзегеш, Кужугет Шойгу, Донгак Бегзи, Екатерина Танова, Чооду Кара-Күске дээн ышкаш ат-сураглыг чогаалчылар болгаш шүлүкчүлер улуг амыдыралче оруун моон алган. «Шын» солуннуң школазы тыва журналистиканың Владимир Чадамба, Светлана Монгуш, Артур Хертек, Вера Куулар, Таан-оол Хертек, Шангыр-оол Суван дээш билдингир хоочуннарын өстүрген.
Юбилейлиг байырлал үезинде «Шын» солуннуң хоочуннарынга болгаш ажылдакчыларынга күрүне шаңналдарын тывыскан. Олар-биле кады Владислав Ховалыг солуннуң ажылдакчыларынга үрде манааны белек – «Лада Веста» машинаның сертификадын тыпсып, ол машина-биле редакцияның ажылдакчылары Тываның булуңнарын хала чокка кезип, чурттакчыларның, болуушкуннарның дугайында чугаалап бээрин күзээн.
Редакция коллективи солуннуң болгаш ниитизи-биле тыва журналистиканың хөгжүлдезинге үлүг-хуузун кииргеннерни боттарының талазындан демдеглээн. Ынчангаш «Шын» ниитилел-политиктиг солуннуң 100 чылдаанынга тураскааткан юбилейлиг медальды кылдырткан. СЭКП Тыва обкомунуң бирги секретары Григорий Ширшин, Тываның бирги президентизи Шериг-оол Ооржак, солуннуң ажылын башкарып турган хөй-ниити ажылдакчызы болгаш эртемден Алдын-оол Канзай, медальдың төлевилелин ажылдап кылган Тываның улустуң чогаалчызы Начын Шалык, "Шын" солуннуң хоочуннары Галина Монгуш, Тамара Калчан, Кунзенмаа Монгуш болгаш Таисья Монгуш дээш, өскелер-даа медальдың бирги эдилекчилери болганнар.