Регионалдыг диспетчер албан чериниң медээзинден алырга, Тывада Чыраа-Бажының арга-арыг ажыл-агый участогунда ниитизи-биле 112 га черни ээлээн бир өрттү төндүр өжүрген. 46 кижи болгаш 9 санныг техника аймаан ынаар хаара туткан турган.
Өрт сезону эгелээнден бээр 175 арга-арыг өрттери бүрүткеттинген, оларның 172-зи арга-арыг фондузунуң 18126,98 га шөлдүг черлеринге болган. Эрткен чыл-биле деңнээрге, оларның саны 1,16 катап эвээжээн, өртке алыскан шөлдер 2,2 катап кызырылган.
Сентябрь 17-ге чедир республикада арга-арыгже кирерин кызыгаарлаан өртке удур онза чурум чоруп турар. Арга-арыг инспекторлары корум-чурум үрээшкиннерин илередип, болдурбазы-биле көжүп чоруур постуларга патрульдап, амдыгаа чедир ажылдап турар. Сезон эгелээнден бээр 38 административтиг херекти оттурган, 172 билдириишкинни эрге-хоойлу камгалаар органнарже чоруткан. Чурттакчы чон-биле суртаал-профилактика ажылдары уламчылавышаан.