Сентябрь 3 – Россияда уттундурбас болуушкуннар календарында кажыыдалдыг хүн. Бистиң чуртувус 2004 чылдың сентябрьның баштайгы хүннеринде Соңгу Осетияның Беслан хоорайга болган каржы-дошкун террорчу үүлгедигниң түңнелинде 300 ажыг кижи, оларның хөй кезии чаштар, амы-тынындан чарылган айыыл-халапты сактып, мөгейиг хүнүн демдеглеп турар. Бесланның айыылдыг болуушкуннары делегейни дүвүредип, Россияның төөгүзүнде кезээ мөңгеде төнмес аарышкылыг арын бооп артып калган.
Россияның төөгүзүнде кезээ мөңгеде оожургал чок аарышкылыг арын – Бесланның халаптыг болуушкуну бүгү делегейни хөлзедипкен.
Бүгү Россияда ышкаш, Тыва база, террорчу хөделиишкиннерден бистиң чуртувуска болган шупту коргунчуг болуушкуннарның когарааннарынга база террорчу ёра-биле демиселге чок болган маадырларга мөгейигни илереткен. Күрүне Думазының болгаш «Новости» РИА-ның саналдааны-биле, Тываның Дээди Хуралының оран-савазында «Украин неонацисчи террор чурумунуң болуушкуннары» деп делгелге ажыттынган.
Тываның күрүне университединге профилактиктиг акцияны эрттирген. Иштики херектер яамызының, Федералдыг кеземче албанының, Тываның националдар херектериниң талазы-биле агентилелдиң удуртукчулары интернет четкизинде терроржу болгаш экстремисчи чоруктуң айыылындан боттарын болгаш чоок кижилерин канчаар камгалаарын студентилерге чугаалап, бөгүнгү хүн аңаа чок болган кижилер дугайында чүгле мөгейигниң эвес, а террорга удур ниити камгалал - серемчилелди болгаш билиглерни кижи бүрүзүнге сагындырып турар.
Чаа өөредилге чылының бүдүүзүнде Тываның Баштыңы Владислав Ховалыг корум-чурум камгалаар органнарның, Тываның Соңгулда комиссиязының болгаш өөредилге адырының киржилгези-биле, Тыва Республикада террорга удур комиссияның болгаш оперативтиг штабтың каттышкан хуралын эрттиргенин сагындыраал. Аңаа регионда социал адырның объектилерин террорга удур камгалаар системаны экижидеринче угланган шиитпирлерни хүлээп алган.