Регионалдыг диспетчер албан чериниң дыңнатканы-биле алырга, сөөлгү хүннүң дургузунда Тывада 16 гектар ниити шөлдүг 2 өрттү өжүрген.
«Амгы үеде Чөөн-Хемчик кожуунда Чыраа-Бажы арга-арыг ажыл-агыйының девискээринде чүгле 1 өрт арткан. Ону өжүреринге 46 кижи болгаш 9 единица техника киржип турар. Кожууннуң девискээринге өрт халавының нептерээрин болдурбас дээш онза байдалды чарлаан» - деп, Тываның арга-арыг сайыды Григорий Ондар чугаалаан.
Бо чылын өрт сезону эгелээнден бээр ниитизи-биле 175 арга-арыг өрттери бүрүткеттинген. Эрткен чыл-биле деңнээрге, оларның саны 1,16 катап эвээжээн, өртке алыскан девискээр 2,2 катап кызырылган.
Тываның арга-арыгларында өртке удур айыыл чок чорукту хандырары-биле арга-арыгже хамаатыларның база автотранспорт аймааның кирерин кызыгаарлаан тускай чурум сентябрь 17-ге чедир уламчылап турар.