Дүүн «Тываның маадырлары» төлевилелдиң өөредилге программазының таныштырылгазы болуп эрткен. Президент Академиязының күрүне эргелеп-башкарылгазының дээди школазындан база Тываның күрүне университединден өөредилге хемчээниң таныштырылгазынга Республиканың Баштыңы Владислав Ховалыг, кадрлар төлевилелиниң киржикчилери болгаш кураторлары киришкен.
Республиканың Баштыңы Владислав Ховалыг ужуражылганың киржикчилеринге байырын чедирип тура, республиканың удуртукчулар командазының кежигүнү болур арганы «Тываның маадырлары» регион программазы тускай шериг операциязының киржикчилеринге база хоочуннарынга берип турарын демдеглээн. «Маңаа салым-чаяанны ажыдып, дидим эгелээшкиннеринге деткимчени ап, бистиң үениң езулуг маадырлары апаарынга үнелелди алыр. Бодунга харыысалганы хүлээнип, өскерлиишкиннерже базымнарны кылырынга белен кижи бүрүзү маадыр бооп болур дээрзинге бүзүрээр бис» - деп, Тываның Баштыңы демдеглээн.
Төлевилел элээн каш чадалардан тургустунган, оларның аразында «Күрүне болгаш муниципалдыг удуртулга» программа-биле өөредилге, тренерлер болгаш дагдыныкчылар-биле ажыл, күрүне эргелеп-башкарылга болгаш тус чер чагырга органнарынга стажировка, киржикчилерниң түңнел аттестациязы, ажылга хаара тудары азы республиканың удуртукчу кадрлар курлавырынче киирери бар. Өөредилгелер Тываның күрүне университединге болур, а Президент академиязының командазы башкылаашкын коллективи-биле сырый ажылдаар.
«Келир үеде удуртукчу чаа албан-дужаалдарга томуйлаттырган соонда, федералдыг болгаш регионалдыг хөгжүлдениң хүн чурумунга хамаарышкан билиглеринге болгаш билиишкиннерге даянгаш, амгы үениң удуртулга аргаларын ажыглап, стажировка үезинде алган практиктиг арга-дуржулгазынга даянып, тургустунган даалгаларны чедиишкинниг шиитпирлээринге белен болур кылдыр киржикчилеривисти белеткээр сорулгалыг бис» - деп, Президент Академиязының күрүне эргелеп-башкарылгазының дээди школазының «Тываның маадырлары» программаның академиктиг директору Александр Зорин чугаалаан.
Бир чыл үргүлчүлээр бо чылдың өөредилге программазы бөгүн эгелээр. Ол дөрт кезектен тургустунган болгаш киржикчилер боттарның дагдыныкчыларның удуртулгазы-биле стажировканы эртерлер. Программада доктаамал спортчу кичээлдер, маргылдааларга, угаан-сайзырал оюннарынга киржилге, ол ышкаш шериг чораан кижиниң анаа амыдыралга чаңчыгарынга дузалыг командалар аайы-биле хемчеглер кирген.
Киржикчилерни оон аңгыда гуманитарлыг хемчеглер манап турар. Ынаар республиканың төөгүзүн ханы өөренири, культурлуг хемчеглерни, ооң иштинде Алдан-Маадыр аттыг Тыва Республиканың Национал парыгынче, концерттерже, алдарлыг артистер-биле темалыг кежээлерже баары, кинолар көөрү кирип турар.