«Тыва» күрүнениң теле-радио компаниязының журналистери Россия Федерациязының Президентизиниң Сибирь федералдыг округта бүрүн эргелиг төлээзиниң деткимчези-биле чылдың-на эртип турар «Сибир.ПРО» деп регионнар аразында журналисчи ажылдарның XX-ги мөөрейиниң түңнелдери-биле тергииннерниң санынче кирген.
Бо чылын мөөрей Ада-чурттуң Улуг дайынынга Тиилелгениң 80 чыл оюнга тураскааткан болгаш «Улуг Сибирь. Тиилелгеже үлүг» деп ат-биле эрткен. Сибирь федералдыг округтуң шупту регионнарындан журналистерниң, бөлүк авторларның болгаш медээ четкилериниң 1,3 муң ажыг ажылдары киришкен мөөрейниң түңнелдерин сентябрь 1-де «Сибирь.ПРО» албан езузунуң сайтызында парлаан.
Оргкомитеттиң дыңнатканы-биле алырга, жюри «Сибирь гвардиязы» кол номинацияның беш угланыышкынының ийизинде республиканың төлээлерин шаңнаан. Аңаа Сибирьниң дайынчыларының болгаш тылдың ишчилериниң маадырлыг чоруунуң, дайын соонда күш-ажылчы болгаш хөй-ниитичи ажыл-чорудулгалар дугайында үндүрүлгелерин сайгарып көрген.
Электроннуг массалыг информация чепсектериниң журналистериниң аразындан «Тыва» КТРК-ның медээлер албанының редактору Саяна Салчактың тускай шериг операциязыннче эки тура-биле аъттанган чаңгыс чер чурттугларының дугайында «Истории СВОих» деп бөлүк радиодамчыдылгалары тиилекчи болган.
«Электроннуг массалыг информация чепсектери» деп бөлүкке «Тыва» күрүнениң теле-радио компаниязы Ада-чурттуң Улуг дайынының үезинде республиканың фронтуга дузалашканының дугайында «Тиилекчилер» деп репортажы дээш бирги черни алган.
«Сибирь гвардиязындан» аңгыда, экономикадан эгелээш, келир үениң технологияларынга чедир аңгы-аңгы темалыг 19 номинацияларга журналистерниң материалдарын сайгарган. Оон аңгыда мөөрейниң партнерлары бо чылын 3 тускай шаңналды доктааткан.
Мөөрейниң оргкомитеди Россия Федерациязының Президентизиниң Сибирь федералдыг округда бүрүн эргелиг төлээзиниң, ол ышкаш «Сибирь.ПРО» ХХ-ги мөөрейниң үндезилекчилериниң болгаш партнерларының шаңнал тыпсыышкыны сентябрь 22-де Новосибирск хоорайга болурун дыңнаткан.