Тываның Баштыңы Владислав Ховалыг Тыва Арат Республиканың эки турачыларының төөгүлүг сактыышкынның болгаш мөгейигниң хүнүнге тураскааткан митингиге киришкен. Хемчегге Корум-чурум камгалаар органнарның ажылдакчылары, эрге-чагырганың, аныяктар шимчээшкиннериниң төлээлери, хоочуннар болгаш тускай операцияларның киржикчилери, ол ышкаш хөй-ниити ажылдакчылары аңаа киришкен.
Тыва эки турачыларга тураскаал чанынга болуп эрткен митингиге, аныяк армейжилерниң хүндүлүг таңныыл болганнар. Тыва эки турачылар хүнүнге тураскааткан чыскаалды Кызыл гарнизонунуң начальниги, подполковник Вадим Колмягин командылаан. Тураскаалдың чанынга Россияның болгаш Тываның Күрүне туктарының, ол ышкаш Тиилелге тугунуң тудукчулар бөлүү чыскаалыпкан, митингиге келгеннер сактыышкынны кылып, мөгейиг кылдыр боодал чечектерни салган.
“Бөгүн бистиң национал чоргааралывыстың хүнү-дүр: тыва эки турачылар бодунуң чонунуң чагыын алдар-биле күүсеткенин – Совет Армияның шериглериниң маадырлыг үлегерин кажанда-даа сактып чоруур бис. Тиилекчи, шынчы, бедик хей-аъттыг, эрес-дидим кижилерниң салгакчылары бис. А бистиң бөгүнгү хүлээлгевис – немец-фашистиг эжелекчилер-биле демиселге маадырлыг чоруктарын көргүскен Тываның эрес-дидим оолдары, кыстарының төөгүзүн салгалдан салгалче дамчыдып, оларның дугайында сактыышкыннарны кадагалап, Ада-чуртувустуң төөгүзүнде ол болуушкуннарны өскертир дээн оралдажыышкыннарга удурланыры болур” – деп, Тываның Баштыңы Владислав Ховалыг тураскаалдыг хемчегниң төөгүлүг ужур-утказын демдеглеп бижээн.