Тывада школачы автобустар парыгының чаартылгазы план езугаар чоруп турар. Республиканың Баштыңы Владислав Ховалыг өөредилге албан черлериниң удуртукчуларынга 25 чаа школа автобустарының дүлгүүрлерин чаа өөредилге чылының бүдүүзүнде тывыскан.
Чаа автобустар бирги ээлчегде, республиканың ыраккы болгаш чедери берге кожууннарында өөреникчилерниң таарымчалыг болгаш айыыл чок аай-дедир аргыжылгазын хандырар. Бо чылын кадыкшылы кызыгаарлыг болгаш кадыы кошкак уругларны өөредип турар албан черлеринче онза кичээнгейни угландырган. Кызылдың 10 дугаар ортумак ниити билиг школазы база Тожу кожууннуң Ий суурда санаторлуг школа-интернат тускайжыттынган машиналарны алган.
«Көдээ школалардан, ылаңгыя ыраккы, чедери берге кожууннардан уруглар школаже чедер таарымчалыг байдалдарны алырынга өөрүп тур мен. Шупту машиналар айыыл чок чорукту хандырган: тахографтар, ГЛОНАСС навигациязы, дүрген чоруурун кызыгаарлаар болгаш чырык-биле медээлер бүгү-ле херек чүүлдер-биле дериттинген» - деп, Владислав Ховалыг демдеглээн.
Россияның Президентизиниң болгаш федералдыг чазактың деткимчези-биле школа автобустарының парыгы доктаамал чаартынып турар. Эрткен чылын республика 47 чаа автобустарны алган, ам Тывада уруглар сөөртүр тускай машиналарның ниити саны 280 ажа берген, деп Тываның Баштыңы онзалап айыткан.
Автобустарны өөреникчилерни школаже хүн бүрүде аргыштырарынга, спортчу болгаш культурлуг хемчеглерже, дыштанылга черлеринче тускай бөлүктеп сөөртүрүнге ажыглап турар. Школа автобустарының чолаачылары айыыл чок чоруктуң негелделеринге дүүштүр тускай өөредилгени албан эртер.