Август 29-та Тываның Баштыңы ажыл албан аайы-биле Чөөн-Хемчик кожуунга чорааш, Чадаана хоорайда Россияның Маадыры Сергей Шойгунуң өг-бүлезиниң бажың-музейиниң чанында туткан арт-объектиниң ажыдыышкынынга киришкен. Тудугну тыва көшкүн чонуң чаңчылчаан чурттаар оран-савазы – өг хевирлиг кылдыр туткан. Ол Шойгуларның бажыңы-биле кады чаңгыс музей комплекизин тургузуп, экспонаттар делгеп, аалчылар хүлээп, янзы-бүрү хемчеглерни эрттирер зал кылдыр ажылдаар.
Владислав Ховалыг бо болуушкунну бодунуң блогунда демдеглеп тура, Чадаананың чурттакчылары музейни хөгжүдер эгелекчи саналды кииргенин онзалап демдеглээн. «Тус чер бюджединиң акша-хөреңгизи-биле боттары эгелээн. Тудуг ажылын Монгуш Доржу Дамба-Доржуевич кылган. Республиканың Культура яамызы төлевилелди боттандырарынга база дузалашкан: Алдан-Маадыр национал музейниң фондузундан Сергей Кужугетовичиниң ажылдары база ооң төрээн черинге кээп чораанын көргүскен 12 фото-чуруктарны делгээн. Музейниң удуртулгазы аңаа янзы-бүрү чырыдыышкын хемчеглерин эрттирерин планнаан» - деп, ол демдеглээн.
Шойгунуң чаңгыс чер чурттуглары боттарының эгелээшкинин мынчаар тайылбырлаан: Россияның ОБЯ база Камгалал яамызының келир үеде удуртукчузунуң төрүттүнген болгаш баштайгы базымнарын кылган бажыңынга шупту экспонаттары амгы үеде сыңмастаан, оларның саны 200-тен ашкан. Бо чылын аңаа 15 муң кижи кээп чораан.
Шойгуларның музейинге хамааржыр чаа объектиниң ажыдыышкыны, Тываның төөгүлүг кожууннарының бирээзи, совет үеге чедир Урянхай край турган Даа кожууннуң 260 чыл оюнга тураскааткан байырлал хүннеринде болуп эрткен. Ол эң-не улуг деп санаттынып, республиканың амгы үеде беш кожууннарын – Чөөн-Хемчик, Сүт-Хөл, Улуг-Хем, Чаа-Хөл болгаш Өвүр девискээрлерин бактаап турган. ХХ чүс чылдың эгезинде Даа кожуун болгаш ооң чагырыкчылары Тываның Цин империязының дарлалындан хосталырынга база Россия-биле харылзааны тударынга шиитпирлиг рольду ойнап, 1944 чылда РСФСР-ниң составынче автономнуг область кылдыр кирген.