Тываның Баштыңы Владислав Ховалыг Даа кожууннуң 260 чыл оюнга турскааткан байырлал хемчеглеринге киржип чорааш, Чөөн-Хемчик кожууннуң Хайыракан суурда чаа ФАП тудуун хынаан. Тудугну «Идепкейжи узун назын» президентиниң национал төлевилелиниң кадык камгалалының бирги звенозун чаартыр ажылдар-биле чорудуп турар.
«Ажылдар график езугаар чоруп, хайыраканчылар аарыг кижилерге чугула эмнээшкин база дүрген эмчи дузазын чедиреринге херек бүгү чүүлдер-биле дериттинген чаа оран-савага эмчи дузазын удавас ап эгелээр» - деп, Тываның Баштыңы объектини кезип көргеш, бо чылын беш суурда: Хорум-Даг, Бажың-Алаак, Хайыракан, Теве-Хая база Шемиде чаа ФАП-тарны тудуп турарын бодунуң блогунда бижээн.
Хайыракан суурда ФАП-ты 2025 чылдың октябрьда дужаары планнаттынган. Объектиде белеткел ажылдары доозулган, оран-саваның кол өзээн тудуп, коммунал четкилерни кожуп, крышазын база инженер системаларын салган. Иштики шеверлел ажылдары доозулгалак, чоок-кавы девискээрин ам чаагайжыдары арткан. 33 чыл стажтыг эмчи Татьяна Чаш-ооловна Ондар пунктунуң эргелекчизинде томуйлаткан, 800 ажыг улуг кижилер болгаш 900 хире уруглар быжыглаттынган ФАП-ты үш ажылдакчызы-биле ол хандырар.
Владислав Ховалыг ол чорааш, национал төлевилел-биле бүрүн септелге ажылдары чоруп турар Чөөн-Хемчиктиң кожууннар аразының эмнелге төвүнүң кезиишкин салбырын хынаан.
"Барыын кожууннарже баар орук Чадаана таварты эртер, ынчангаш бо эмнелгеден эмчи дузазын дилеп кээр кижилер кайы хөй – деп, Тываның Баштыңы демдеглээн. – Керээ чарган тудуг чери ажылдың нарынын билир – мында онза байдалдарга таварышкан кижилерниң амы-тынын камгалап турар, ынчангаш ажылды бедик шынарлыг кылыры чугула. Бо бүгү ажылдаарынга таарымчалыг байдалды тургузарынче болгаш эмчи дузазының чедингир шынарын хандырарынче угланган".
Объектиде септелге ажылдарының, ооң иштинде сантехниканы, чылыг системазын, хана шывыын болгаш шаланы салырының сөөлгү чадалары дооступ турар. Кырын, одалга, суг хандырылга база ток удазыннарын долузу-биле солаан. Ниити ажылдар 85 хуу белен. Септелге соонда, аарыг кижилер таарымчалыг байдалдарда, амгы үениң дериг-херекселдери-биле шынарлыг эмчи ачы-дузазын алырлар. Эмнелге хериминиң иштинде, аарыг кижилерге база тускай шериг операциязының киржикчилеринге реабилитация хемчеглерин көргүзер черни септеп турар.
Чөөн-Хемчик кожууннуң девискээринде эмчи дузазын көргүскен Кожууннар аразының эмнелге төвүн кол эмчи Шораана Ховалыг удуртуп чоруур. Чөөн-Хемчик кожууннуң чурттакчыларын хандырган төптүң тургузуунда Чыраа-Бажы суурда эмнелге амбулаториязы, Баян-Тала, Ийме, Бажың-Алаак, Теве-Хая, Чыргакы, Шеми, Хайыракан, Хөндергей, Хорум-Даг, Элдиг-Хем суурларда 10 ФАП, хүнде-ле 429 кижи хүлээр поликлиника, кезиишкин, божудулга, гинекология, терапия, инфекцияга удур, туберкулез, уругларга соматика салбырларлыг чыдар эмнелгелер, хүндүскү стационар болгаш 2 бригадалыг соңгаарладып болбас дүрген эмчи дузазының пунктузу ажылдап турар.