Бо хүннерде Тывада Даа кожууннуң тургустунганындан бээр 260 чыл оюн демдеглээн онзагай хүннер чоруп турар. Мерген-Херел Монгуш аттыг кожууннуң культура бажыңынга юбилейге тураскааткан байырлыг хурал болуп эрткен.
Тываның Баштыңы Владислав Ховалыг кожууннуң чурттакчыларынга байырны чедирип, республиканың төөгүзүнде ооң улуг ужур-дузазын демдеглээн. Даа кожууннуң удуртукчулары эрткен чүс чылдың эгезинде Россияның чалгынының адаанга Тываның хөгжүлдезиниң уг-шиин тодараткан дээрзин, Владислав Ховалыг демдеглээн. "Бистиң төөгүвүсте балаттынмас исти арттырып каан күш-ажылчы, эрес-дидим, салым-чаяанныг кижилерниң өскен төрээн чери-дир. Байырлал-биле, эргим чаңгыс чер чурттугларым!" - деп чугаалаан.
Байырлалдың кол кезээ шаңнал тыпсыр езулал-биле доозулган.
Хөй чылдарда ак сеткилдиг күш-ажылы дээш, Чадаана хоорайның 4 дугаар школазының директорунуң оралакчызы Ковеймаа Монгушка, Чыргакы школазының төрээн дыл болгаш чогаал башкызы Оксана Хен-оол, Чыргакы суурнуң «Чинчилер» уруглар садының кижизидикчи башкызы Сайлык Ооржак, кожуун чагыргазының специализи Раиса Кенден оларга Тываның Баштыңының Өөрүп четтириишкин бижиктерин алган.
Чөөн-Хемчик кожууннуң Бажың-Алаак школазының директорунуң оралакчызы Эрик Ооржак, Чадаана хоорайның 1 дугаар школазының тыва дыл болгаш төрээн чогаал башкызы Урана Куулар, Теве-Хая школазының химия башкызы Ляна Чульдум, Хандагайты школазының төөгү болгаш ниитилел билиглериниң башкызы Александра Монгуш, Хандагайты школазының орус дыл болгаш литература башкызы Долаана Монгуш, «Чечек» уруглар садының кижизидикчи башкызы Долаана Монгуш, Шекпээр школазының орус дыл болгаш литература башкызы Долаана Кюжюгет, Шуй школазының тыва дыл болгаш төрээн чогаал башкызы Айланмаа Хертек, кожуун чагыргазының специализи Долаана Кара-Сал, муниципалдыг албанның хоочуну Чайна Ооржак, Чадаананың чагырга чериниң аштакчызы Аиша Карамонгуш Тыва Республиканың Баштыңының Хүндүлел бижиин алганнар.
Чылгы мал ажыл-агыйын хөгжүдеринге үлүг-хуузу болгаш хөй чылдарда ак сеткилдиг күш-ажылы дээш Баян-Тала биле Хөндергей суурлардан хууда дузалал ажыл-агый баштыңнары Сакта Монгушка база Василий Ондарга «Тыва Республиканың алдарлыг чылгычызы» аттарны тывыскан.
Көдээ ажыл-агый адырынга хөй чылдарда ак сеткилдиг күш-ажылы дээш «Тыва Республиканың көдээ ажыл-агыйының алдарлыг ажылдакчызы» хүндүлүг атты Чадаана хоорайда хууда дузалал ажыл-агый баштыңы Роман Монгушка тывыскан.
Монгуш Чечен-оол аттыг спортчу олимпийжи курлавырлар школазының тренер башкызы Аяс Делгер-оол "Тыва Республиканың алдарлыг тренери" атка төлептиг болган.
Муниципалдыг албанның хоочуну Сурун-оол Чулдум «Шылгарагай күш-ажылы дээш» медаль-биле шаңнаткан. Хөй чылдыг арга-дуржулгазы болгаш профессионал чоруу-биле республиканың социал-экономиктиг хөгжүлдезинге улуг үлүг-хуузун киирген.
Албан езузунуң кезээ доозулган соонда, Даа кожуундан үнген бот-тывынгыр коллективтер болгаш алдарлыг артистерниң байырлал концерти эгелээн.
Даа кожуун 1765 чыда үндезилеттингенин сагындыраал. Тываның Амбын-Ноянының чагыргазынче кирген бешки кожуун, девискээр болгаш чурттакчының чонунуң саны-биле эң улуг чер. Ол Саян дагларындан Таңды-Ууланың мурнуу чүгүн база чөөн талада Кузнецкиниң Алатаудан Элегес чедир чапты берген девискээрлиг. Амгы үеде ол черлер Чөөн-Хемчик, Сүт-Хөл, Улуг-Хем, Чаа-Хөл база Өвүр кожууннарны хаара туткан.